蘋果公司（Apple）嘅iWatch，果粉非常期待，據聞佢哋依家喺各地搞緊商標註冊，包括中國內地，由於佢哋喺內地「見過鬼」，今回就小心好多喇。
根據內地商標網顯示，一共有3間公司申請咗iWatch商標，其中有一間已被駁回，而另外兩間公司，商品種類就同智能手錶或者電腦產品無關，所以蘋果公司暫時唔使為中國商標傷腦筋。
絲絲記得蘋果公司當年推出iPhone同iPad嘅時候，內地有兩間公司分別擁有呢兩項商標，最終蘋果公司要分別用365萬美元（約2,847萬港元）同6,000萬美元（約4.68億港元），買番iPhone同iPad嘅內地註冊商標，認真「濕滯」，望就望今次唔使用錢買番個商標啦！至於日本，據聞已經向日本專利廳申請咗「iWatch」註冊商標，其中包含平板電腦或者手錶設備嘅產品。
講開科技嘢，Summly今年三月，以3,000萬美元（約2.33億港元）賣身畀雅虎呢單刁真係令人津津樂道。
有份投資入Summly嘅維港投資，創辦人周凱旋尋日喺《新浪科技》話，起初對押注喺一個當時只有15歲嘅少年身上，都驚輸錢兼輸商譽，其後佢同D'Aloisio開會後，認為此小子非池中物，仲猛讚佢有令人震驚嘅洞察力、游說力同領導力，相信佢將Summly賣畀雅虎，係對自己前途嘅理性選擇。
余詩韻