期指觀瀾：氣氛偏淡先行忍手
向來市場唔多重視中國官方非製造業PMI，在市況氣氛唔好下，利淡消息變得草木皆兵，尤其周二復市淡友做晒大龍鳳炮製反彈壓在0.382阻力樓下，兼高開低收單日轉向，數得出的短期見頂訊號都出齊，借兩個服務業PMI數字麻麻，加埋歐債息急升的消息，淡友昨日順利踩多個市一腳。
昨日個市基本上係周二翻版，恒指以近全日高位開市，全日被沽盤壓制，埋單跌511點報20,147點，10日線再失守。
前日提過，由期指完成轉倉後成交快速萎縮，多少顯示上一輪冚淡倉已大致完成，客觀因素又較為對淡友有利，只係估唔到，兩日掟番逾800點落嚟，期間好友幾乎完全無嘗試還手的影蹤。
期指昨日開市半個鐘左右，已跌穿了20,415點的止賺位，筆者於高位無食胡，感覺真係比輸錢仲難受。客觀分析，過去幾星期跌市，仲可以賴內地錢荒，但昨日人民幣隔夜息已落番去超過一個月低位，內地經濟及中資股份中期業績如果無暗病，就肯定係基金已經洗倉洗到無章法可言。
雖然筆者仍相信上次低位19,426點應該離浪底不遠，但見到單日明顯轉勢訊號出現前，奉勸揸家最好停一停、忍一忍。
John Mullen