Market Insight：餐飲股 再跌有得諗

不過點都好，沽空佔大市成交比例14.06%，連續十一日高於一成，亦係八個交易日以來最高，可見無嘢好買之下，唔少大孖沙選擇賭跌。中國官方六月非製造業PMI，是跌市原兇之一，數字按月回落0.4至53.9，創九個月新低，另反映內地小企業情況的滙豐中國服務業PMI，則微升0.1至51.3，繼續在四月創下的廿個月低位附近徘徊。較受注目的新業務指數降至50.5，創○八年十一月以來新低。

查實，舊年內地服務業大約佔全國GDP四成六，有趣係非製造業指數一向唔太受重視，連彭博資訊都無列出大行預測數字，有趣是，半年結之後內地頭寸鬆番唔少，人民幣隔夜拆息再跌0.386厘去返3.4厘，超過一個月低位，比六月二十日高位13.44厘，大幅回落七成半，錢荒唔再係跌市藉口。

古勝冇點你

萬里長空

基金套現唔留手

另一邊廂，葡萄牙局勢也愈見不穩，近兩日更多部長級官員辭職，執筆時十年期葡債息見過7.9厘，同五月中低位5.163厘比較，累積回升了超過五成，與德國十年期債息息差擴闊至6.26厘的今年新高。歐債危機復燃，昨日成為港股尾市彈唔起兼且要踩多一腳的催化劑。

今年中港股市對比歐美股市表現大大落後，貪套現容易的基金往往當港股係ATM，當然，最重要係大家睇唔到短期內地政策有緊轉鬆的可能，唔怕畀人挾，自然係有得掟就掟，無得掟就索性沽空。大市升跌比例83比17，比例幾乎是一升五跌，大球場中資銀行股及一堆市值有番咁上下的中型股，似股災一樣。

要錢唔要貨，重農行（03618）、農行（01288）、民行（01988）、工行（01398）、招行（03968）及交行（03328）跌幅介乎3.1至5.6%，而過去一個月累積跌幅則介乎15.6至24.1%，累積跌得最勁的民行主攻中小企融資，存款基礎相對細較依賴同業市場，拆息上升個市驚息差壓力最大，被基金狂隊，現時拆息落番，前日先有大行唱好，指民行會係利率市場化得益者，一樣被隊到爆，多少見到個市開始有恐慌味道，無客觀分析可言。

快餐股向來是抵拒經濟逆境佳選，但過去兩星期大家樂（00341）、大快活（00052）及翠華（01314）前後腳出業績後，得大家樂企得住，另外兩隻股價浸浸落。睇番三隻餐飲股上一個財政年度純利分別增長14%、7%及24.7%，往績市盈率25倍、14.4倍及35.6倍。

翠華估值屬最高

大家樂成立四十五周年派特別息25仙，或多或撐住股價不跌，3.77厘股息率，其實同大快活4.47厘比較（同樣有10仙特別息），足以彌補去年餐飲業務增長低於大家樂的因素。餐飲股較少受經濟周期影響，如果大快活回到16元樓下，中長線持貨開始有吸引力。

後起之秀翠華，本地及中、澳門收入去年分別升28.9%、1.52倍及55.4%，無疑飛快成長，可是進取擴展的代價是折舊及租金升幅比收入還高，分別升86.6及58.3%，成本控制會是其今年業績增長關鍵。三股中翠華估值最高，大行睇法分歧，德銀降到沽售睇3.3元，去年底以2.27元上市，意味點掟都有錢賺，三股之中，如果出現急跌，古勝會揀前面兩隻。

合生元似已轉勢

中資股輪流洗白白，近日連強勢股都難免一跌。好似奶粉股合生元（01112），今年以來股價一直跑贏大市，上周四曾高見48.1元，上周五收報43.5元。

本周一內地消息指有關部門針對進口奶粉展開反壟斷調查，奇怪的是周二長假後復市，合生元股價未見大跌，收報43.05元，畀足機會讓大家先行「逃生」，等到昨日才玩「笨豬跳」，以大成交撻落全日低位35元，最多跌近19%，收報37.45元，跌13%。經驗相告，若然其股價未能在短時間內重上高位，走勢將會轉弱，想執平貨，都係多一事不如少一事！

古勝