《紐約時報》最近列出全球200位最高薪CEO嘅名單，當中有28位係科技界人士，其中（手豆）最高「人工」嘅，竟然係「1蚊雞CEO」，即係甲骨文嘅埃利森（Larry Ellison），花紅、員工福利等高達9,620萬元（美元‧下同），仲要比舊年多近二千萬元，賺咁多唔通真係唔怕畀股東「詐型」？
呢位年薪只有一美元嘅埃利森，「人工」都係嚟自啲好飄忽嘅收入，好似9,069萬元期權，近400萬元花紅，同154萬元員工津貼！排第二位嘅係美國遊戲開發商動視暴雪（Activision Blizzard）行政總裁Robert Kotick，雖然佢薪酬無埃利森咁多，但就比上年人工增幅近7倍，有成6,490萬元，而且佢嘅底薪亦係最高，超過200萬元！
英特爾行政總裁奧特利尼（Paul Otellini）都唔輸蝕，有1,890萬元，而雅虎CEO邁耶（Marissa Mayer）都有3,660萬元，單係股份就值3,500萬元！最意想不到嘅係，蘋果公司行政總裁庫克同Facebook創辦人朱克伯格竟然榜上無名，唔通因為要跑業績，（手豆）少咗人工或者花紅？
余詩韻