絲絲講場：恒指關永盛最驚市唔郁
股民炒股最愛大上大落，貪有波幅。不過編製恒指嘅恒生指數公司董事兼總經理關永盛（Vincent）就話，股市升跌好閒，反而唔郁就驚。
好似九八年政府入市打大鱷嗰日，恒指本應每分鐘跳一次，但嗰日竟然試過連續幾分鐘個數值郁都唔郁，同事都急起嚟，圍喺顯示板前面，拎住所有股價再計一次，check吓個指數到底準唔準，可見恒指若唔郁，反而係大件事！
「直通車」創新高冇感覺
關永盛同幾位同事日前接受《恒園》訪問，細訴恒生指數嘅「大時代」，當中有血有汗，反映住香港社會變遷，絕對係香港人的集體回憶。
九八年打大鱷呢幕就驚心動魄，咁○七年十月受「港股直通車」刺激，恒指衝上31,000點歷史高位呢幕呢？答案係投資者就亢奮，但恒生指數公司卻「反高潮」，辦公室一啲異動都冇。Vincent話，佢哋只係計指數，破唔破紀錄唔會有特別感覺！
Vincent仲話，七三年恒指由1,700點到落150點，電視劇都經常以呢段股災作為故事橋段，因此恒指嘅角色除咗係市場基準外，仲係香港經濟嘅歷史見證。
報價速度見證大時代
最近恒生指數發布時距提速至每隔2秒，原來六九年恒指推出時，每日只係喺收市後才發布一次。依家大家一定好難想像。當時交易所嘅價表仲係寫喺黑板，恒指公司職員每日要去交易所手抄收市價，然後拎返公司用計數機計算。到八六年為咗準備期指買賣，發布時距就縮短到每分鐘一次，九九年因應盈富基金推出就進一步加快至每15秒一次。
余詩韻