期指觀瀾:港股短線動力減弱

寫隔夜稿難,在於預測唔到交稿後,美股走勢,隔晚道指曾經見過15,083點,完全修復上周五跌幅,雖然最後收唔到15,000點樓上,升幅收窄到65點報14,974點,但已足以令預料會低開的港股,全日走勢同寫稿時想法有異。

昨日現貨居然可高開201點,完全無視假期間內地公布的官方製造業PMI差勁的數字,更是萬二分意料之外。不過,當睇完下半場,恒指最終要高開低收,由頭殺到落尾,淡友下半年一開局已搶佔先機,造頂兼炮製單日轉向格局,營造短期反彈已經差唔多的氣氛,確係佩服!

昨日現貨開市後,即見全日高位21,004點,剛比23,512至19,426點跌浪的0.382反彈阻力位20,987點高17點,陰燭兼單日轉向,加埋昨日期指成交唔多,似乎冚淡倉動力也在減弱,對短線反彈不利。

或者看官會話筆者以20日線(21,043點)作為好倉食胡目標太貪心,結果呢次捉到鹿唔識脫角,昨日高位近千點帳面利潤無食胡,認真罪大惡極。但既然以日報形式提供心得,筆者也盡量用可以隔晚指示方式操作,今浪低位入市注碼只係平常三分之一,實行以幅度補嘗張數不足,訂20,415點止賺,繼續揸住先。

John Mullen