Market Insight：好淡陣營 戰意薄弱

真係唔明，點解好友會未開市先興奮，昨日恒指開過天價，本文提過假期間公布的六月中國官方製造業PMI，危危乎跌到接近50的盛衰分水嶺，得50.1，加埋習主席暗示中央無救市大動作的言論，六月大插完又反彈過的港股，現貨及期指成交減少反映，睇好睇淡雙方入市意欲都有減弱迹象，先冷靜部署下一波攻勢。

反而今浪彈得少的A股，在奇差的PMI公布後不跌反升，藉昨SHIBOR回順，隔夜及一星期息口分別落0.67厘去到3.78厘及4.75厘，幫滬綜指再彈多11點重上二千關口，收2,006點近全日高位，同10日線阻力2,010點已收窄至一步之遙。即使無製造業的數據咁大震盪，但期指客仲係要睇實今朝官方六月非製造業PMI及滙豐編制服務業PMI數字，可能影響早市走勢。

古勝冇點你

萬里長空

銀基財政令人憂慮

代理五糧液的銀基集團（00886）截至三月底勁蝕11.33億元，每股輸0.91元（等於股價六成二）！中央打貪之後，茅台及五糧液等酒價急瀉，中期業績時銀基半年得2.35億元生意額，卻有8.8億及12.32億元存貨及應收帳的銀基，隨時揩大鑊。

業績中公司解釋虧損主要係對經銷商為白酒進行一次過的回購，同時對應收帳大撥備所致，以全年銷售額跌86.9%至3.9億元計，即下半年得1.55億元，又比上半年再跌34%。三月結時存貨及應收帳分別係12.2億及4.26億元，即係比中期時分別多咗38.6%及減少65.4%，6.68億元減值撇銷相信主要是經銷商的應收帳款。

端午前後內地白酒價有反彈迹象，可能係昨日股價神奇地低位拗腰反彈的誘因，但睇見盤數負債升4.5倍去到9.16億元，負債比率升到七成四，加埋銷售額急跌及資產過半是應收帳及存貨，真係自問無劉央的膽色及咁鍾情白酒，博反彈似乎風險同回報唔成正比。

樓市調控仲未鬆綁

假期期間，新加坡政府針對樓價升唔停，宣布了海嘯後第八輪出招壓抑樓價，今次要求銀行評估買樓人貸款申請時，要一併考慮申請人所有債務，包括房地產和非房地產貸款，貸款人每月還款亦不得超過收入六成，估唔到香港咁鬼無「吉士」，曾財爺轉頭有樣學樣，放風話針對近期量跌價升，樓市調控未許全功，唔排除再出招冷卻樓市。

財爺成日話推出大堆措施，SSD、BSD、DSD主攻需求管理，將炒家及投資者驅逐出樓市，但古勝親身經驗，身邊有樓揸手者，本來想沽樓套現或換大啲改善生活，都因為大堆措施索性唔搞，怕將來買新物業要畀一大堆辣招綁死，仲要畀雙倍印花唔划算，形成街外二手盤源急速萎縮嘅現象。

昆能仍需反覆尋底

讀過中學經濟都識，供應同需求曲線一齊向下，樓價只會持平唔會向下，即使財爺話佢無樓價下調的目標！

在下想既然政府一大堆措施，講到底是要buy time等未來增加供應，既然學人何不學到十足，新加坡政府最大的住屋安全網，係唔使市價七折，只以大部分市民可負擔價錢向首置市民出售「組屋」（形式似居屋），解決八成新加坡普羅市民住屋需要，至少減低私樓狂升下，對急需住屋需求的上車族需要。

大摩報告唱好電力股，預計大唐發電（00991）同華電國際（01071）分別在未來十五日及三十日股價上升機會大。摩笛一奏，唔使等一頭半個月，昨日兩隻股份分別逆市升9%及4%。

此外，上周發改委宣布調高非民用燃氣價格，投行一致認為中石油（00857）得益最大，結果昨日股價表現亦最標青，高位見8.88元，收報8.8元，升6.6%，升幅相等於恒指升37點。不過，旗下從事下游業務嘅昆侖能源（00135）則受影響，股價跌6.2%，收報12.9元，都幾閉翳，皆因50日線已跌穿250日線，技術走勢再度轉弱，估計短期尚要反覆尋底，暫不建議溝貨或撈底。

古勝