絲絲講場：鴻昇接通北方大水喉
自從○八年金融海嘯爆發之後，本地證券商嘅生意就愈嚟愈難做，券商要突圍而出，唯一方法就係升級轉型。因此本地老牌華資證券商鴻昇證券亦一樣，早前就獲得新資金注入，務求開拓更多金融產品同服務，殺出重圍。
而今次為鴻昇證券注入新資金嘅人物，就係深圳市創展控股集團主席馬俊明，今後佢私人注資，更會擔當鴻昇金融集團主席，帶領公司重新出發。據絲絲了解，馬俊明喺國內從事金融、地產、能源等生意，業務好廣泛。
搬新Office無敵海景
話到明「重新出發」，所以鴻昇證券亦搬咗新辦公室至上環信德中心。上周六，佢哋就搞咗個喬遷酒會兼晚宴，絲絲亦有幸被邀出席。聽鴻昇證券董事兼總經理張益祖話，新辦公室係馬生嘅自置物業，面積差唔多有三、四千呎，更有無敵大海景添！而酒會當日，絲絲亦見到唔少金融界朋友畀面出席，好似有恒豐證券嘅林家亨、金利豐嘅黃德几等等，場面非常熱鬧，難怪馬老闆成日都笑口常開啦。
余詩韻