美國中情局前職員斯諾登洩露美國情報事件惹起唔少公司關注保護敏感訊息嘅重要性，阿里巴巴集團星期一就向員工發出一張備忘錄，呼籲員工淨係用阿里巴巴嘅通訊軟件溝通，言下之意即係叫員工唔好用競爭對手騰訊嘅QQ同微信（WeChat），以防公司內部嘅機密資料畀外界竊取！
睇嚟阿里巴巴都擔心公司會發生斯諾登事件，提早一步保障公司嘅資料，之但係呢張本來只係畀內部員工睇嘅備忘錄，唔使幾個鐘就畀人放上互聯網，絲絲都認真擔心阿里巴巴能唔能夠做好「信息數據安全」呢一環！
其實亦難怪阿里巴巴咁緊張，事關QQ同微信（WeChat）係內地最多人使用嘅通訊產品，旗下有員工使用都唔出奇，但最怕佢哋利用軟件討論公事，畀「間諜」竊取就大件事！絲絲知道阿里巴巴依家正爭取進行IPO，以藉此躋身國際科技舞台，所有公司嘅訊息都異常重要！
簽署備忘錄嘅阿里巴巴首席風險官邵曉鋒，喺信中仲提到阿里巴巴嘅員工掌握好多關鍵嘅產品訊息、業務計劃、客戶資料等，當中更會涉及敏感嘅財務同個人訊息，一個唔覺意將呢啲訊息洩漏咗，唔單止會影響到公司嘅業務，仲會牽連幾億消費者、過千萬嘅企業同商家嘅數據安全，甚至未來市場嘅走向，好大鑊咁話！之不過通告就發咗，能唔能夠落實就要視乎公司嘅監控工作喇！
余詩韻