倫敦金屬交易所（LME）亞洲年會嘅重頭戲LME Dinner尋晚喺灣仔會展舉行，呢個又稱black tie dinner嘅晚宴首次喺香港搞，筵開80圍，有成九百幾人出席。
擔大旗收購LME嘅港交所（00388）行政總裁李小加，舊年出席倫敦LME Dinner時已大出風頭，今年喺自己主場，更施展渾身解數，喺晚宴上大玩棟篤笑。臨散場時，小加總裁仲未夠喉，仲表演埋舞龍，大家冇睇錯，真係成條長長火龍咁畀佢舞。台下就有嘉賓拍案叫絕，仲講笑話佢第日唔撈港交所，可進軍演藝事業！
呢個black tie dinner，出席嘉賓嘅衣着成為焦點，在場所見，最少有八成跟足dress code，男士個個「踢死免」，打晒煲呔，好似港交所主席周松崗，董事許照中、郭志標等，鬼咁型仔。前主席夏佳理雖冇打煲呔，但打咗條黑呔就好特別，細望之下，原來係絲絨質料，夏佳理就笑指係啲後生話畀佢聽依家興喎！
亦有嘉賓着上民族服裝，好似證監會主席唐家成就着中山裝，金利豐老闆娘朱李月華同證券學會會長李細燕就着唐裝衫，而港交所資訊技術科平台發展高級總監韋正君（Julian Ragless）仲着埋蘇格蘭裙。
雖然LME Dinner氣氛高漲，但下晝LME年會就發生一段小插曲，話說場內除咗研討會外，仲同時設有多個參展櫃位，等金屬期貨商、資訊供應商等可以趁機會做吓市場推廣工作，拉吓生意。
點知，有個別參展商就唔多高興，呻大會安排不周，話參加研討會人數雖多，但對參展櫃位卻「過門不入」，坦言非常失望，但偏偏收費卻絕不便宜，換言之，錢就花咗，但就達唔到預期效果，仲話出年「拒絕再玩」咁話喎。睇嚟，要小加總裁呵番囉！
余詩韻