Market Insight：急跌後有見底迹象

由於中移（00941）落實為建設4G基站招標，有消息配合，古勝昨日睇住隻中興A股（000063），早市先插低6.2%，收市前拗腰倒升8.3%，即市高低波幅達16.4%，猶如過山車一樣。港股昨日一樣上演先殺好友，再誅淡友的劇本，恒指最低見過19,426點，等同去年九月初水平，收市前跟A股反彈，全日升41點報19,855點，大市波動性大，刺激主板成交增至928億元。

新地有留意價值

恒指波幅指數（VHSI）曾升上去30.18一年高位，去年六月港股在歐債危機下，隊到落萬八點附近，當時恐慌指數在58.6點見頂！昨日上升及下跌股份比例28對72，比周一10對90稍有改善，創新高股份10隻，創新低達181隻之多。

港匯有緩步轉強趨勢，執筆時報7.7559，比月中低位回升過百點子，種種迹象顯示，就算恐慌拋售造出的浪底，並非中期的低位所在，古勝相信也相當接近。有外資行老友提醒在下，話近期唔少中資對沖基金，要錢唔要貨狂掟一些中型市值股份，昨日沽得八八九九，幾乎連櫳底都見埋，看官們如果有心水，基本因素良好，近期又不明不白被隊到開巷，看官們可以諗吓開始分批撈底。

古勝冇點你

萬里長空

賭仔最鍾意跟紅頂白，股市裏面跟住大股東搵食，通常都無衰，近排見新地（00016）郭老太頻頻出手，已申報於六月十九日同二十日連續兩日增持新地52萬股，均價分別係99.618元及96.953元，涉及資金約5,100萬元，持股量升至43.26%。睇番單係六月份，郭老太已經九次入市。記得郭老太○八年第四季都試過高頻入市增持，最後仲摸埋個底，都咪話無參考價值。

好孩子生意不愁

昨日美銀美林份報告話，剛剛同新地去北美路演，退市陰霾及新盤銷售條例所限，新盤滯後推出拖累近日股價回落，唔少機構投資者都對新地重拾興趣，認為就算香港樓價真係要由高位大跌五成，新地股價仲比資產淨值折讓16%（目前折讓達51%），同歷史平均折讓相若，加埋近日郭老太在100元樓下密吸，該行繼續予買入評級，睇135元相當於30%資產淨值折讓。

想搵隻細價啲，昨日留意到隻專做嬰兒手推車的好孩子（01086），由低位彈9%收報2.84元，短短一個月，由月初高位4.3元撻落昨日最低2.61元，跌近四成，期間除了基金股東富達沽過些少貨出街之外，其實無乜壞消息出過，今次小股災，一堆outperformer二三線都真係幾傷。

公司主要以「好孩子」及「小龍哈彼」兩個品牌推出嬰兒推車，基本上往績極穩定，過去六年業績賺介乎1.6億至2億元之間，衰啲講直頭係悶。

不過，做小朋友生意，勝在長做長有，內地父母連兩罐奶粉都南下嚟香港買，可見洗錢在仔女身上真係在所不計，最近有分析員估內地銷售團隊人事有變，加埋內地零售業表現一般，未必達到市場樂觀的預期，但就算打個九折今年賺2億元，都係14.3倍左右，同樣炒內地一孩政策告一段落，至少佢比奶粉股平一大截。

金礦股難有運行

近日多家大行下調金價預測，其中高盛更料年底見金價見每安士1,300美元、明年更會低至1,050美元。金價睇跌，金礦股難有運行。雖然昨日港股大幅波動後最終還是結束跌勢，報升收市，但紫金礦業（02899）及招金礦業（01818）分別跌5.3%及7.2%，現價較52周高位累計跌幅達五至六成。

　鑑於金價弱勢已成，金礦股盈利前景不容樂觀，股價難言見底，加上呢類股債項不輕，在息口回升之下，風險上升，故橫睇豎睇，長中短線均不宜沾手。

古勝