六月尾七月頭，又係大學生畢業搵工季節，孖妹身為過來人，當然希望為一心投身金融界嘅莘莘學子，提供最強職場錦囊妙計喇！近年環球經濟正值多事之秋，金融機構都難咗搵錢，搞到要開源節流，可見今天要搵份好工並非易事！而且第一份工就如第一次炒股，當中心情總是戰戰兢兢，正如以下三位金融界重量級人士一樣，無論現在佢哋事業如何成功，想當年咪一樣要面對工作上嘅「第一次」挫折，但只要你肯勤奮上進，前途勢必無可限量嘅！
Look's Asset Management董事總經理兼投資總監陸東
高妹：搵工最重要係對準目標，好似呢位「星級分析員」，自小就知道自己天生食金融呢行飯？
陸：自細我對數字就好敏感，對金錢概念好清晰，所以我好早知道長大後會是個管錢嘅人。八六年我在加拿大讀完書，大學畢業返港後第一份工是入恒生銀行投資部，想當年嘅團隊只得三個人，人少自然多嘢做多嘢學。記得八七年初港股由2,550點升至八月份3,600點，當時我認為港股已經大超買，於是建議上司沽期指，其後港股續升，十月初更升至3,949點高位，但我哋依然狠狠咁沽，直至十月尾恒指大跌逾千點，港股決定停市四天。
高妹：初出茅廬就夠膽向上司提出沽期指，仲成功睇啱市，究竟你有無遇過挫折o架？
陸：有，我經常睇錯市o架，亦試過幫客人輸錢，但睇錯咪認錯囉，並且盡快把錯誤修正。如果我百分百保證會贏錢，我就唔使打工喇。仲有當年我向上司提議沽貨，我相信佢都睇到港股超買嘅真實情況，所以佢先至會採取我嘅建議。要記住老闆出糧畀你，你返工就要交個心去做，發表意見係工作責任，有咩唔好意思呀？
高妹：最近你請咗新人，可以透露你嘅招聘員工條件嗎？
陸：Smart（醒目）、Poor（謙卑）、Hungry（渴求），我唔需要甚麼名牌大學畢業，我看重嘅係個人邏輯思維，做人要誠懇，唔好自視過高同時又要不失自信。我最憎就係返工等放工，放工等放假嘅人，對於嗰啲諗住返一年半載就辭職嘅人，我亦一定炒硬。想當年我在恒生都做咗五年先轉工，仲要呢份工做得最短，瑞銀則做咗八年有多，所以現今大學生最好知道自己想做咩，先至好去搵工見工，唔好浪費自己和別人嘅寶貴時間。
高妹：不少大學生都渴望投身金融界，對此你有何提點？
陸：我見過不少大學生好似文盲咁款，中英文唔好之餘，連講廣東話都有懶音，咁死得喇！所以大學時期就應該認真讀書，多參與課外活動，例如加入Debate Team（辯論學會）去訓練口才。因為大部分成功人士嘅人際關係、溝通技巧都非常好，在酒會上，你見到有些人「滿場飛」，與不同行業嘅人都可以傾偈，這些人一定係成功者；相反你見到嗰啲自己坐埋一邊，頭耷耷飲悶酒，呢啲多數係失敗者。總之做咩工作都好，記住「腳踏實地，但不忘摘星（夢想）」。
BCT銀聯集團董事總經理及行政總裁劉嘉時
彩兒：你在美國完成大學學士及工商管理碩士，當年一個香港女仔留美工作，面對第一份工作時會否好大壓力？
劉：畢業後，我去咗間美資銀行做MT（管理見習生），當時我係唯一一個亞洲人，或多或少都會受到歧視，而且我真係一朵溫室小花，自細就唔使擔心衣食住行，亦唔使去打工搵學費，我最大嘅責任就係讀好書，可以話無捱過苦。直至我做第一份工，可能係亞洲人關係，我遇過種種不公平待遇，明明自己把工作做得幾好呀，但升職永遠遲過其他人，感覺好委屈。不過呢個艱苦過程，令我變得更加堅強，懂得如何面對困難和解決問題。
彩兒：有人話，現今嘅大學生付出少少但要求多多，你有何看法？
劉：每一份工作都有優點和缺點，大學生初初踏入社會，心態要開放些，即使不太滿意第一份工作嘅性質，亦應該虛心學習，因為我相信每份工作都有可取之處，那你就去吸收那些好的東西，並且把它變成自己嘅知識。我想，在做第一份工作時，我哋就好似一張白紙，咩顏色都無，而吸收知識就是為自己填上色彩，所以大家切忌抱着驕傲心態去工作，反而要把公司內嘅人際關係搞好，身邊多個朋友總比多個敵人好。
彩兒：今天你是千人之上嘅話事人，成功秘訣係咩？
劉：Never burn your bridges（永不燒掉自己的橋樑），做人做事均要心胸廣闊，不要帶情緒返工，這有助與上司及同事建立良好關係，讓工作順利進行，而且個人過於感情用事並不會證明存在價值，相反不斷勤力學習，工作實力會累積，在適當時機就會得到賞識。
時富金融執行董事兼經紀業務董事總經理鄭文彬
高妹：當年你讀會計出身，機緣巧合才轉戰金融界，咁第一份工做咗幾耐？
鄭：我第一份工作是入KPMG（畢馬威會計師事務所）做審計師，一做就四年。雖然呢行唔算金融界，但當年我都跟好多上市公司和銀行，幫佢哋做財務報告，掹車邊叫做有些關係。之後我經朋友介紹，去咗間內地電訊商公司做項目經理，又做咗兩年，直至九七年，關百豪先生（現任時富集團董事長）搵我幫手參與收購時富金融，於是我先至轉戰金融圈，並一直做到現在。
高妹：第一份工就做四年，我估你都無咩遇過挫折喇？
鄭：我記得返工後接第一個job，就負責搞啲金融衍生工具產品，想當年讀書無教，公司內部培訓又無涉獵，真係唔識做，咁咪邊學邊做囉，一有唔明就勇於發問！我嘅想法好簡單，覺得自己剛畢業，人生無嘢可輸，總之凡事唔識就問到識，年輕人唔好少少失敗就將佢定義為挫折，反而在工作過程中盡量培養獨立性格，在不斷發問求學之中鍛煉與上司及客戶嘅溝通技巧，這些寶貴經驗均可幫助個人成長。
高妹：「英雄莫問出處」，如今你身為金融機構管理層，有咩金石良言？
鄭：你揀工，工揀人，就算第一份工作未必如你所願，但都應該盡量嘗試適應，努力學習吸收這份工作嘅優點。今時今日嘅世界變得好快，社會瞬息萬變快過書本上知識，所以做人一定要不斷求進步，適當時候去進修，好似我都讀緊MBA（工商管理碩士），持續增強個人競爭力。而且金融界嘅工作並不易做，如果你有心想闖出一片天，就記緊要堅持個人原則、勤力、與時並進，務求做到軟硬實力兼備。
高妹＆彩兒
若有料報畀高妹同彩兒或有嘢問，可電郵money.biz@opg.com.hk