早前《鐵甲奇俠3》上映時掀起一陣英雄片熱潮，絲絲同班姊妹都有去戲院捧場，不過醉翁之意不在酒，我哋嘅目光都係聚焦喺男主角羅拔唐尼（Robert Downey Jr.）身上。絲絲最近仲收到消息，羅拔仔將會以1,200萬美元（約9,360萬港元）嘅身價，成為HTC智能手機嘅代言人。
智能手機品牌競爭愈演愈烈，HTC當然唔可以落後於人，所以就搵咗最近好受歡迎嘅羅拔仔做代言人。HTC同羅拔仔簽咗兩年合約，之後將會陸續推出電視、平面同戶外廣告。除咗代言費之外，HTC仲將廣告嘅話事權交畀羅拔仔，所有創意元素都會由佢話事。
另外，正所謂人紅起上嚟真係沒法擋嘅，聽講Marvel電影公司已經同羅拔仔正式簽約，拍攝另一套英雄片《復仇者聯盟》（The Avengers）嘅第二、三集，但就無提及會否拍《鐵甲奇俠4》，聽講呢套片仍未傾掂片酬咁話！
雖然絲絲好高興有羅拔仔做HTC代言人，不過HTC嘅股東似乎就唔多滿意公司喺行銷方面用咁多錢。前幾日舉行股東大會時，唔少股東都好關注行銷費用會否影響利潤。HTC執行長周永明就出嚟解釋話，依家公司打緊「世界大戰」，要同全球多個大品牌競爭，所以一定要多啲宣傳，行銷費用係「絕對必要」；而且其他品牌每年嘅行銷費用高達30億到50億美元，係HTC嘅幾倍。
絲絲睇番資料，曾經係全球銷量最好嘅HTC，今年第一季銷量已經下滑至第九位，搵羅拔仔幫吓手點都好啲啩！
余詩韻