絲絲講場:金貿場「大佬」踩入前海

慶豐金集團(已除牌)主席陳發柱近年已好低調,好少喺公開場合見到佢,但係絲絲近日發現,陳發柱早前拍住金銀業貿易場理事長張德熙去咗深圳訪問,探討前海發展商機。

陳發柱再戰江湖?

冇見咗咁耐,陳發柱精神奕奕,唔通佢想再戰江湖?

話說上月底,張德熙率團到訪中國人民銀行深圳市中心支行,與該行副行長會談,探討前海發展計劃。本來拜訪都冇乜特別,但絲絲就發現,與會者仲包括陳發柱等。心水清嘅朋友應該記得陳發柱同金銀業貿易場大有淵源,佢係金銀業貿易場前理事長。以往佢成日出嚟預測金價走勢,風趣幽默,令人印象深刻!

陳發柱低調咁耐,今次蒲頭就探討前海發展,可見前海嘅吸引力真係冇得頂!尤其係對金銀業貿易場嚟講,可能係一大商機。

張德熙早前就好豪氣咁同絲絲講,喺前海概念下,估計金銀業貿易場嘅牌價可望倍數上升,升到二千萬元一啲都唔出奇!事關金銀業貿易場提議喺前海設立金庫、銀庫、同埋檢驗中心,希望將前海同香港嘅合作打造成亞洲區最大嘅國際貴金屬交易中心!

陳發柱對金銀業貿易場素有感情,為貿易場出力籌謀獻計,一啲都唔出奇!

余詩韻