絲絲講場：發達始終靠股樓
絲絲成日都想「一朝發達」，巴克萊一份報告都畀到一啲idea，點樣可以達成目標，報告話逾六成有錢佬嘅財富，都係喺20年之內累積，而主要嘅「發達」途徑係炒股同炒樓。
巴克萊銀行呢份研究報告，訪問咗旗下嚟自全球超過二千名客戶，而富戶係指受訪者嘅淨資產值均超過150萬美元，當中有約200個係淨資產超過1,500萬美元。
三成人財富幾年飆5倍
訪問結果反映，逾62%本港富戶嘅財富，都係喺不足20年內獲得，而致富嘅來源中，82%為個人投資、80%為房地產收益，遠高於從業務利潤同財產繼承而致富嘅人數。而且，呢種「快速致富法」仲好似有加快嘅迹象，有超過三成嘅有錢人話，佢哋近年嘅財富曾顯著增長至少5倍。巴克萊就話同經濟周期縮短、全球化及科技發達有關。
絲絲睇完之後，都即刻要搵番本投資天書嚟刨吓，反正依家個市咁低迷，分分鐘畀絲絲執到啲好嘢而「一朝發達」呢！
余詩韻