絲絲講場：豪特落重本要變Young
豪特保健（06880）上市年幾以嚟，業績同股價一直走下坡，真係唔知傷盡幾多股民嘅心！為咗洗心革面，豪特保健喺舊年「重金」請咗間荷蘭設計公司，幫公司重新包裝，包括Logo、產品同舖頭裝修都有轉變。
進軍內地 望有收成
老闆葉志禮話，一直覺得個品牌太過「亞洲樣」（asian look），俗啲講句即係老土，所以決定請個外國人嚟幫佢哋搞個年輕、活力嘅新形象，仲話部分轉咗look嘅舖頭，街坊反應都好好。
睇番啲資料，豪特保健發過幾次盈警，上個財年啲盈利跌咗八成幾咁多，葉生解釋，其實喺過去兩年，公司不斷開拓內地市場，令到前期投資好大，到依家啲舖頭都逐漸成熟，希望可以進入收成期，仲強調對呢個市場前景好有信心添。佢仲「拍心口」話，新形象有個新開始，希望業績唔會再令人失望咁喎！
余詩韻