匯海策略：日圓可準備再做淡
只能嘆句同澳元有緣無份，今浪兩次想博反彈，僅去到「想」嘅階段，隻袋鼠幣靠害一樣已經行番轉頭。昨日澳洲央行公布會後紀錄，查實內容同估計差唔多，未來仲有減息空間之外，澳元有可能跟隨貿易情況上落，睇見其商品最大出口國中國，經濟前景一片迷霧，莫非央行暗示，把日本「安倍經濟學」推倒匯價打貨幣戰，以刺激出口的一招照辦煮碗？
英國公布五月份CPI升2.7%，高過四月的2.4%，以及市場預期的2.6%，係二月以來首次拗腰回升，數據之後鎊匯在接近四個月高位1.5721水平跌番落去執筆時的1.5628，有趨勢要穿一穿10日線1.5624，如果守唔住，短線有機會下試1.5460及1.5500支持。
歐元短線唔值博
歐元昨日突然由1.3330抽上1.3397，一來係近期歐元區數據續有改善迹象，刺激淡友回補空倉外，昨日歐洲央行行長德拉吉話對非常規貨幣政策抱開放態度，亦都唔擔心低息對刺激物價造成威脅，市場解讀係歐洲央行或者會接受一段時間，歐元區處於負利率，以換取經濟復甦。短線而言，歐元阻力在1.3390及二月高位1.3434附近，昨日沒有在德拉吉開金口前入市，有點追寶尾之嫌，賭上賭落機會均等，筆者決定再睇定啲。
日本財務大臣麻生太郎話安倍經濟學獲G8峰會支持，本來係舊聞，但圓匯昨有迹象在近日高位靜靜起革命，由即市94.44撻到95.44，似有高位轉勢迹象。澳元想摸底摸唔到，決定試一試隻Yen，破95.81追沽，首站目標96.4及97，如再升番轉頭95.22會止蝕。
阿Lam