Market Insight：航運股借勢反擊

不過，言者可能無心，聽者卻有意，尤其今年伯老已講明反傳統唔會出席Jackson Hole財長年會，奧巴馬言論看來已確認伯老明年一月任期滿之後，唔會留低，本已曖昧到暈的退市安排，看來又會多一分變數。

一個月上海同業拆息抽上7厘樓上，市場對內地水緊現象好多解讀版本。有認為傳統半年結銀行保有較多現金以符合規管要求有關，亦有分析話五大行單是近一個月派出2,400億人仔股息，形成六月底水緊。姑勿論誰對誰錯，股市對內地資金面緊張之憂慮，抵銷匯金托市掃入四隻內銀A股的消息，也限制港股表現。

古勝冇點你

萬里長空

內銀大反攻有難度

昨日恒指跌過230點，拗腰平收21,225點，成交唔多，主板僅590億元，沽空比率重返雙位數。瑞銀A股策略師陳李估計，內地最「莫財」係六月最後一星期及七月第一個星期，資金缺口分別係2,090億及5,330億元人民幣，如果人行要對流動性出手干預，最可能是這兩星期的窗口。

上周四匯金一口氣掃四大內銀，論規模是○八年至今，四次入市托市以來最勁。有統計話一一及一二年的兩次匯金掃貨，MSCI內銀指數分別升17及6%，跑贏同期MSCI中國指數的8.4%及2%升幅，今次會唔會歷史重演？今次唔單只中國經濟被睇淡，仲有人行全力處理影子銀行風險，同埋驚利率市場化殺到埋身，內銀或者短期見底，但今次要大幅跑贏其他中字派恐怕唔易。

個市無嘢好炒，地產股之後，輪到極之低殘的航運股發威，借環球大型船舶需求反彈，近排拉動波羅的海乾散貨指數由月初801點幾個箭步，反彈15.4%去到前晚925點。不過，唔好以為好景成咁，現時指數僅及○八年高峰期11,793點的十三分之一，即使同一一年底比較，都係一半都無。古勝都係嗰句：「股票唔可能永遠向下」，跌到咁上下，夠平就有人博反彈。

炒賣殼股談何容易

昨日中海集運（02866）最神勇升13.6%，中國遠洋（01919）升6.1%、中海發展（01138）及太平洋航運（02343）都升4.3%。論基本因素確實好難睇好航運股，但好似中遠，今年一直被空軍(目及)到實，累積沽空大，挾起上嚟補倉都補到氣咳，昨日大成交挾上50日線樓上，短期返到3.8至4元並唔過分。

內地一線房企大部分都經已在港上市，又或透過買殼，在港設立上市融資平台，方便進軍海外市場。近年，內地市場流動性大不如前，為開拓「水源」，見到陸續有二、三線內房跟風在香港買殼。早前民生國際（00938）話與大股東洽出售交易，即惹來內房買殼疑雲，股價大幅飆升。

昨午復牌的深圳科技（00106），獲內房朗詩入主並以溢價提全購，股價一度急升逾兩倍，收報0.9元，升119%，成交2.92億元。內房「點石成金」嘅本領，果真令人驚嘆，缸邊友睇見都流口水。之但係呢類交易一般都收得好密，局外人要冷敲股仔成內房買殼目標有一定難度，所以都係唔恨得咁多！

蒙牛受惠行業改革

蒙牛乳業（02319）宣布收購雅士利（01230）的詳情，二者將於今日復牌。繼增持上游原奶供應商現代牧業（01117）股權後，蒙牛今年第二大舉措就係收購雅士利。自中糧入主，蒙牛致力整頓內部生產流程及銷售渠道過後，現正以行業改革領軍者的角色，四出發掘併購目標，以善用上市融資功能，加快完善產業鏈，並透過與海外同業合作，全面提升生產技術。

過去行業發展幾不盡人意都好，基於社會對食品安全的要求，以及食品行業的戰略考慮，中國乳業須要有本土嘅大型業者主導市場的國策要求明確不過。從中糧入主蒙牛開始，蒙牛的使命非常清晰。睇好內地乳業改革進度，蒙牛長線可以睇好，以現價往績市盈率30倍，若上半年業績確認盈利重拾增長軌道，估值仍然有上調嘅空間。

古勝