Market Insight：好友睇唔通靠邊站

港股假期前再跌260點，收報21,354點，大市跌穿四月中低位21,423點，進一步確認兩個月前的追落後升勢純屬鏡花水月，令人洩氣是去年大行齊唱好的港股，已經比去年底的22,656點跌了逾5%，失望的也包括預期內地經濟在第二季見底的筆者在內。

事實上，近期中國公布的經濟數據，麻煩可能是遠遠高出大部分人估計之內，擠出水分之後，上個月內地出口數字揭露了醜陋的事實，出口僅得1%升幅，內部消費也未見大起色，中央審計署在A股假期間，公布全國三十六個地方政府偏高的債務水平，部分地方政府只能透過新債養舊債去維持，加上假期前上海銀行同業拆息在謠言滿天飛下被挾高，面前太多不解疑團，即使好友信心再強，對投資中資股及A股，都難免有一定戒心，既然睇唔通，不如靠邊站。

古勝冇點你

萬里長空

政策取向快將揭曉

在大行陸續向下修訂全年中國經濟增長預測的同時，市場揣測內地有需要再推包括減息在內的刺激政策，但人行卻一再強調要修正過去幾年寬鬆貨幣政策的後遺症。回顧過去一段長時間，中國經濟頗依賴貨幣供應及外資高固定投資增長去維持，今屆中國領導人有迹象想「修理」長久以來缺乏效益的粗放型經濟，到底最後會狠心讓經濟持續疲弱，抑或再走回頭路，在浮沙上再建海市蜃樓也在所不計，相信唔需要等太耐，或者未來兩至三季，已經會有答案。

近期資金追逐較不受經濟影響的板塊，如互聯網、電訊設備及濠賭股成了短期的避難所，過去一個月方正數碼（00618）升逾一倍，上海復旦（08102）、網龍（00777）、金山軟件（03888）均升逾五成，晶門科技（02878）升49%，晨訊科技（02000）及富士康（02038）也分別升逾三成及兩成，當中不少因盈利能見度極低，又或者業績基數細，故畀到市場很大想像空間。但古勝都係一句，炒概念最緊要先了解自己可以承受風險的程度，且要定下止蝕，皆因股價無可能長期反地心吸力，記緊識上車也要學識落車。

蒙牛中長線諗得過

神十升空，第一時間想起中國航天員專用乳製品的廣告，上網搵搵，今次供應及贊助商都繼續係蒙牛乳業（02319）。去年蒙牛股價在20至24元之間悶足成年，一如伊利及光明兩大競爭對手，其實整個行業在○八年三聚氰胺事件後，一直進行重建消費者信心嘅工作，加強推廣宣傳產品安全，同期在原乳及工資上漲壓力下，使業績無大突破。

創始股東退出，換入中糧的國企式管理後，最近蒙牛與法國達能簽訂合作框架，聯合發展優酪乳研發及生產，有關產品佔蒙牛銷售額大約一成四，講到底，外資參與增加消費者信心方為合作重點。

三聚氰胺事件前蒙牛估值去到30至45倍，近期達能入股消息令往績市盈率重返「三字頭」，短期要獲重估，看來要先交到優於預期的業績至有得傾，但最壞的日子已過，如果跟大市出現較大調整，例如重返24至25元，想中長線揸貨的，已經諗得過。

滬杭甬憧憬炒分拆

近月港股表現不濟，唔單只地產同銀行股，就連高息股如公用股同房託亦要捱沽，好似領匯（00823）一個月唔夠，單位價格經已唔見咗兩成。不過，公路股表現算係相對穩定，其中滬杭甬（00576）本周二股價更逆市上升2.5%，收市報6.54元。公司派發末期息每股0.24元人民幣，將於本月二十五日除淨，料此前股價有一定支持。

再講，公司申請分拆旗下內地證券業務在A股市場上市一事，已於上月初獲得中證監批准。宜留意若下月內地IPO市場如期重啟，下半年滬杭甬有望落實分拆計劃，從而拉升估值，股價可望跑贏同業及大市。

古勝