絲絲講場：李澤鉅接班一年 系內股價跑贏大市
長和系主席李嘉誠去年五月確立長子李澤鉅為集團接班人，唔經唔覺過咗一年，證券界前輩同絲絲講，李澤鉅（Victor）接班後呢一年來成績唔錯，系內公司股價累計有一至兩成升幅，跑贏恒指同期嘅升幅，Victor瞓身搞嘅長江基建（01038），股價更曾創出歷史新高，反映第二代接班後系內公司股價並無折讓。
正如外資大行麥格理所講，港府連串辣招出台後，地產股跟隨樓市下調，睇淡整體地產發展股，但就睇好長實最具防守性，維持跑贏大市評級，目標價125.23元。美銀美林亦指長實防守性佳，受息率影響程度低，亦有助於和黃嘅盈利貢獻，評級買入，目標價105.8元。
見加國部長傾投資
絲絲又八到，尋日Victor亦以東道主身份，喺長江中心總部會見加拿大農業及農業食品部部長The Hon. Gerry Ritz，會上集中討論加拿大嘅投資政策及環境。
原來現時長和集團喺加拿大嘅投資額已達到211.16億加元（約1,600億港元），員工接近6,000人，除咗大家熟悉嘅赫斯基能源，仲有電廠Stanley Power，同藥品公司WEX等。市場亦有傳長江基建打算競購澳洲天然氣管道項目、加拿大電力與天然氣項目等。
余詩韻