絲絲講場：王忠桐為避規管蝕得慘
王氏港建（00532）○六、○七年先後兩次想私有化，點知小股東唔buy，主席王忠桐話怕怕，佢話：「搞私有化我自己都好傷，每次都要蝕千幾萬，又要自己畀錢！」絲絲問佢點解硬係要私有化，佢話係「唔想應酬證監會，好煩，今朝11點先搵個律師上堂，講解新嘅聯交所規則……」原來如此！
勞民傷財暫時唔諗
金融海嘯後，環球監管機構都重視咗風險管理，收緊唔少條例同守則，本港亦唔例外，王忠桐大呻公司條例成日改，好似尋日上晝，佢又要搵律師上堂，update吓有乜新規例。
除咗怕證監會煩之外，公司股票成交太少，都係私有化嘅原因，大股東都係想畀小股東有機會套現，再搵其他投資，不過最終都因股東反對而失敗。佢話暫時唔諗住再搞喇，皆因之前兩次都係用自己錢，夾夾埋埋使咗超過二千萬，唔肉赤就假。外界有傳佢賣殼，佢話放咗咁多心血落公司，賣就點都有啲唔捨得。
轉攻高增值儀器設備
歐美市場仲未復原，王忠桐話今年首季出口往歐美日市場嘅業務仲好差，好在四月起轉好；佢仲為公司訂下五年計劃，希望將產品重點由毛利率約15%嘅電子消費品，轉至毛利率達三、四成嘅醫療、升降機等高增值儀器，目標係後者佔總收入三成。
余詩韻