康宏理財（01019）主席王利民（Quincy）早排冒生命危險去北極跑咗一轉，估唔到成為股東會嘅重點問題，小股東尋日好肉緊咁問：「萬一你喺北極返唔到嚟，有無Plan B？」
無論做生意，抑或挑戰自我，Quincy一向都咁搏，唔知大家記唔記得佢話當日喺北極凍到好似搽咗收縮水咁？其他人聽到就得啖笑，畀着係康宏嘅小股東聽到真係驚餐死。
有股東趁尋日股東大會，當面質問Quincy：「萬一喺北極發生意外，返唔到嚟，咁點算好？公司點營運……」仲問Quincy有無B計劃喎，Qunicy事前應該冇諗過小股東會問呢啲問題，所以即刻口啞啞，不過小股東咁關心佢，算係賺咗啦！
提起康宏理財，Quincy已經係代言人，所以小股東嘅擔心都不無道理。早排佢先話有興趣拍戲，過吓癮咁話，如果真係如Quincy所願，可以飾演「牙擦蘇」，照計就無咩打鬥場面嘅，應該唔使拎Approval啩？