騰訊（00700）主席馬化騰早前表明，要幫旗下微信拓展東南亞市場，公司喺海外市場嘅一舉一動格外受到關注。
外電尋日報道，馬化騰將會喺本周三端午佳節，親自前往馬來西亞，同當地上市嘅ICT服務企業Patimas簽定一份涉及股權合作嘅數據中心業務計劃，就連採訪邀請都登咗出嚟。
但騰訊尋晚就澄清，根本唔知份「採訪邀請」嘅由來，亦從未聽聞騰訊同呢家大馬企業會開展任何嘅業務合作。
呢個合作傳聞，最早源於大馬一份印刷媒體，再經馬國通訊社報道，彭博嘅資訊終端亦有轉載呢個消息同埋「採訪邀請」，有晒時間地點，講明馬化騰會主持簽約儀式。有證券行嘅分析員睇咗呢份「採訪邀請」，曾試圖向騰訊了解有關嘅詳情。
據騰訊嘅好友告知絲絲，聽到呢個「邀請」後，公司上下實在「丈二金剛摸不着頭腦」，唔單止公司內部從未聽聞同呢間公司有任何合作，就連馬化騰嘅私人秘書都無聽聞老闆會前往大馬出席任何簽約儀式！
尋日Patimas喺大馬嘅股價升8.33%，騰訊升1.8%，唔知同呢單離奇傳聞有冇關？