絲絲講場：劉永好撐囡夠班接棒
內地第一代企業家近年相繼部署退休歎世界，做過多年中國首富、有「飼料大王」稱號嘅新希望創辦人劉永好，早前宣布退位，將總資產超過二百億人民幣嘅商業王國交畀80後愛女劉暢打理。有人批評佢做法「太心急」，劉永好日前忍唔住開聲辯護，話阿女接班前其實經過咗好多前期準備，「絕非偶然」，仲大讚愛女做新希望六和董事長17日以來嘅表現好好，令佢好欣慰。
劉暢創業捱過苦
劉永好為咗栽培乖女接班，可謂用心良苦。劉暢十四歲就被送咗去美國讀書，○二年讀完個MBA學位返內地，只係問阿爸借咗一百萬一嘗做時裝店老闆嘅滋味。
劉永好話，嗰時仲未有直航機，見阿女揹住個麻布袋，自己走去浙江入貨，採購、財務、董事長一腳踢咁辛苦，都覺得好心痛，不過又想個女多啲喺社會上鍛煉吓，所以都忍住冇阻止佢，最終間舖因為經營不善，執笠收場。劉暢之後又做過餐飲業、去過廣告公司返工、最後先至入返新希望任職，由低做起。
五年前起儲人才
講到接班，劉永好話其實公司喺十年前就開始醞釀人才儲備，五年前開始着手準備，大家依家只係見到董事長劉暢，其實背後係一個好大嘅團隊。不過，講到愛女由細細個去豬場、雞場，又嫌污糟又嫌臭，到依家改變態度，覺得運用科技養豬都可以好時尚，劉永好都覺得好欣慰，仲話阿女接班時間雖然短，但表現令佢好滿意。
余詩韻