孖妹S檔案：朝聖巴郡向股神學到乜?

盧志威：「面聖」後即入貨做股東

盧：豐盛金融組合交易經理盧志威

高妹：你就好喇！未夠三十歲就見到「神迹」，「朝聖」機會難逢，你出發之前有無做足準備？

盧：今次全因為我有個朋友係巴郡股東，佢拎到兩張入場券，但又無人陪佢去，我先可以「冷手執個熱煎堆」！出發前，我重讀巴菲特自一九五七年起寫嘅「致股東的信」，希望可以了解多啲股神嘅投資模式與投資心路歷程。其實我一直都好想見巴菲特真人，今次難得有機會，於是我去咗美國十日，喺奧馬哈更專登去埋巴菲特嘅屋企、辦公大樓外面影相留念，以及去佢至愛嘅扒房食嘢，務求盡量拉近自己與股神嘅距離。

高妹：有人話巴郡股東大會就好似「資本家嘅胡士托狂歡」，十足嘉年華會一樣，多嘢玩多嘢睇又多嘢食！

盧：係呀，記得五月四號就係股東大會，當日我凌晨五點就起床去排隊，希望早啲入場霸個靚位。點知，原來巴菲特喺股東大會未正式開始前已到達場地，造就我可以近距離望見佢，當然由於股神有幾個高大威猛嘅黑人保安傍住，所以我就影唔到合照了。講番場內情況，入場後你會發現有不少巴郡旗下投資嘅公司擺檔，例如汽車保險公司GEICO、See's Candies（時思糖果）、Dairy Queen（冰雪皇后）等等，而所有股東更可以優惠價去幫襯。如果你有時間的話，仲可以去排隊參觀巴郡收購嘅私人飛機，總之真係玩一日都玩唔完喇！

巴郡股東周年大會證件。

在巴菲特嘅辦公大樓外面影相留念。

股神轉數快對答幽默

高妹：今年巴郡首季業績報喜，純利按年升51%至48.9億美元（約381.4億港元），你除咗親耳聽到股神報喜，仲聽到不少股東「鍥而不捨」嘅發問，有咩感覺？

以巴菲特為造型嘅膠鴨仔。	後面就是「股神」之家。	巴郡股票資料

盧：今次我親歷其境聽到巴菲特嘅演說，發現佢雖然已經82歲，但頭腦轉數好快，面對任何問題虛心作答之餘，又不失風趣幽默。事實上，今年不少股東都集中發問關於股神退休或仙遊之後，巴郡前景及表現係咪無以為繼嘅問題。其實巴菲特堅信價值投資法則，其投資模式就係建立極高安全性嘅企業護城河，即企業發展前景及盈利具有長期競爭優勢，以確保可獲穩定及長線嘅投資回報。因此就算巴菲特退休，我都唔擔心巴郡業績會倒退。

揀股揀人皆眼光獨到

高妹：所以你「朝聖」之後就決定買入巴郡A股，正式變身巴郡股東？

盧：其實買入巴郡A股係我同家人嘅共同投資，而我管理緊嘅投資組合則有買入巴郡B股。私人投資方面，我唔會定止賺位，暫定持貨十至二十年，因為我對巴郡股票有信心。但我覺得巴菲特揀股票眼光夠準之外，佢連睇人都好準，因為佢曾經在股東信內提過，若投資者唔想買股票，則可買入由William Ruane管理嘅Sequoia Fund（紅杉基金）。

翻查資料，呢隻基金由一九七○年開始做投資，基金回報一直跑贏同業，即使靈魂人物William喺○五年逝世，換上第三代接班人Robert Goldfarb打理，基金回報依然長升，由此可見巴菲特嘅睇人眼光好勁，令我相信巴郡日後嘅接班人質素一定有保證。

陳惠仁：持股贏逾5成未夠鐘沽

陳：Chartwell Capital投資總監陳惠仁

彩兒：你同巴菲特淵源深厚，想當年喺股神穿針引線下，訪問過巴郡不少管理層，其後仲出埋書，但點解今年你無去巴郡股東大會呀？

陳：記得三年前我寫嘅《Lessons from Warren Buffett's Top Business Leaders》就是在巴郡股東大會場內正式發布，當時更獲得不少朋友幫助，但近兩年我工作繁忙，抽唔到時間出席，我真係感到好慚愧。但我永遠記得，我能夠第一次以股東身份去參加巴郡股東大會，係源於二○○一年美國「九一一」事件發生後，不少美股都大跌，巴郡股票亦不例外，所以當時我就以每股約6萬美元買入巴郡A股，造就之後我可以親身見證巴菲特投資價值理念嘅機會。

彩兒：咁你之後有無繼續增持或沽出巴郡股票？

陳：我喺○二年七、八月至○三年美股即將見底時，都有增持巴郡股票，其後就在○八年金融海嘯爆發之後至○九年初則再度入貨。基本上，我投資巴郡股票嘅帳面升幅已逾50%以上，但我唔會考慮沽貨住，因為我覺得巴郡股票就好似一隻古董錶，有投資價值，但亦包含住一份情意結，似係私人珍藏。不過，我講過「呢個世界無股神」，如果未來巴菲特退休或者仙遊，對巴郡股價一定會有所打擊。如果投資者現在先去買入呢隻股票，無疑已到達該公司盈利大幅增長嘅「水尾」階段。

A股B股應怎樣揀?

彩兒：巴郡有A股及B股之分，前者每股入場費要過百萬港元，後者則不用一千蚊港元就有交易。投資者點揀好呀？

陳：只要你有美股戶口就可以買賣巴郡股票，而且巴郡係無派息，所以你亦唔需要畀股息稅等費用。其實A股及B股唯一分別就係前者擁有投票權，後者沒有，基本上兩隻股份嘅走勢雷同，A股升，B股亦會照升，只要巴郡業績做得好，則兩隻股票嘅回報升幅會非常接近。