Market Insight：港股不利因素未消

上星期，港股累跌逾800點，周五收報21,575點，五日跌咗四日。更弊嘅係成個星期跌市，成交唔見特別多，要知股市調整往往以恐慌性拋售結束，萬一恒指要跌穿四月份低位21,423點的話，樂觀看去年底起步位21,098點或者有點支持。

但較令人擔心是牛氣沖天的美股，一旦都因為債息急升而抖一抖，最壞情況是美日中股市齊齊弱勢，在三路挾擊下，港股或有機會返到去年九月急升的上升裂口，即20,146至20,475點。

美國公布五月就業數據，非農就業職位增加17.5萬個，好過市場預期的16.3萬個，以及四月經修訂後的14.9萬，不過失業率由7.5%回升至7.6%。數據公布後，十年美債息抽上2.16厘，番到去一星期高位，但華爾街一於少理，上周初急跌的道指連彈兩日，上周五再升207點，報15,248點。

古勝冇點你

萬里長空

出口術降退市預期

評級機構惠譽認為，五月就業數據唔足以支持聯儲局退市，因每月非農職位要增加達20萬份以上，至能夠令就業市場全面復甦。此外，被視為聯局主席伯南克喉舌的財經寫手Jon Hilsenrath在華爾街日報撰文話，即使聯儲局本月商討減少買債，但到落實執行，點都要等今年較後時間。由此看來，聯儲局內的鴿派仲會繼續出口術，以減低市場對退市預期的憂慮。

睇見美股大升，本來夜期都係威係勢，比上周五收市升172點，去番21,525點，可惜周末內地公布的經濟數據確實很差。中央嚴打假出口下，五月內地出口得1%升幅，同市場估計的7.3%差一大截，進口更跌0.3%，與升6%的預期南轅北轍，反映內地無論出口及內需情況都比想像中仲要壞。國統局公布一至五月固定投資名義增長20.4%，又比一至四月放緩0.2百分點。今日起內地A股休市三日，數據差成咁，恐怕港股要選擇性地跟美股行，睇嚟都唔容易。

上周五港股尾段愈跌愈有，事緣芬佬界流傳有內地銀行在拆借市場資金到期仍未能收回，一石激起千重浪，隔夜SHIBOR一度抽到去15厘，最後要由人行出手解困。姑勿論傳言堅定流，近日人仔拆息，又真係由谷底回升唔少，可見內地資金頭寸仲係偏緊，除非人行轉風向，再推寬鬆政策甚至減息，否則咁落去，對短期經濟及股市後向頗為不利。

美強中弱可買創科

個市跌足三星期，上星期得番三隻藍籌唔使跌，分別係康師傅（00322）、華潤創業（00291）及利豐（00494）。頭兩隻今年無點威過，基金要隊都無貨，唔跌唔出奇。至於利豐，年初被分析員輪流唱衰大插插之後，都未有耐返到13.5元樓上，但基金無嘢買之下，搵佢試試，多少反映資金見中國短期無景，認為賭美國經濟復甦勝算較高的傾向。

於最近幾個月，美國二手樓銷售數字持續在每月500萬間附近水平，同○九年初一次小陽春之後再跌番落去嘅情況有啲唔同，有迹象顯示，今次美國樓市復甦的持續性比較強，古勝就第一時間想起創科（00669），其現價一三年市盈率約為18.3倍，同十年歷史平均差唔多，假如估值能夠去到以1個標準差水平，即23倍左右，股價可見25元。若然股市美強中弱的情況持續，見創科回吐，看官們不妨買多少壓吓倉底。

資金轉炒衍生工具

上周五跌市，個別近期熱炒嘅內房殼股亦「腳軟」，好似金地商置（00535）就跌8%收場，收報1.1元。此外，炒中央扶持嘅光伏股升勢亦暫停，保利協鑫（03800）及卡姆丹克（00712）分別跌3%及7%。

看來，指數波幅擴大，部分炒家轉博指數相關衍生工具賭大細，令留在場內炒作概念股的資金相對減少。且看本周端午假前大市能否作出反彈，若部分炒輪證的資金回流炒股仔，話唔定科網、光伏等與傳統經濟直接關係不大的板塊，失驚無神又會翻炒一轉！

古勝