絲絲講場：合興網上外賣攬「御宅族」
「御宅族」之風大盛，搞到一街都係宅男宅女，做零售嘅真係好攞命。喺內地華北地區經營「吉野家」同雪糕品牌「冰雪王后」嘅合興集團（00047），就睇中宅男宅女都要食飯嘅需要，部署外賣網上電子平台。
網頁版打頭陣再出apps
合興行政總裁洪明基（Marvin）做過研究，內地外賣需求龐大，除咗部分年輕人少咗出街，內地經常塞車亦令唔少人對外出用膳卻步；其實公司依家都有提供電話外賣服務o架，不過有啲顧客連打電話都嫌煩，所以計劃下半年推出外賣電子平台，全自動幫客人落單。首先會有網頁版，遲啲諗吓出apps。現時外賣佔生意額約一成半，以去年營業額計算，即大約2,900萬元。
上半年佢哋都受到H7N9禽流感嘅打擊，佢預期下半年銷售會逐漸改善。公司會考慮自家發展同埋收購其他餐飲品牌，條件當然係要夠好食同埋有增長潛力啦。