香港為咗打擊樓市炒賣，早前推出多項「辣招」，有冇效就見仁見智，不過，美國聯儲局主席伯南克就大讚香港嘅「辣招」夠創新！
話說財經事務及庫務局局長陳家強今年四月出訪美國，期間同伯南克見面，陳家強有提及美國推出嘅QE，伯南克亦對香港推出嘅「辣招」瞭如指掌。陳家強仲同伯南克講，一直都有提醒香港人唔好諗住美國推QE，永遠都係低息環境。
兩人都有講到美國幾時退市，陳家強估計美國唔會突然話退就退，一定會慢慢收。近期香港競爭力排名由第一位跌落第三位，咁陳家強擔唔擔心呀？佢話唔會Oversell（過分吹捧），亦唔會Undersell（過分低估）香港，覺得香港仍然有優勢，仲話其他市場爭做人民幣離岸中心冇問題，「我最鍾意見到競爭！」
ibond近期熱賣，陳家強話諗緊，除咗通脹掛鈎外，其他模式嘅零售債券，但年期唔會長，因為散戶唔接受。