吉利集團自從一○年以18億美元買入富豪汽車（Volvo）之後，大家都好期望有新景象，最近終於有啲睇頭，董事長李書福形容得好誇，話「打開車門係北京，閂埋車門就係北歐」，原來喺汽車內部空氣做咗工夫。
自從完成收購後，佢哋嘅銷售數字一直都無好轉，仲不升反跌，單係舊年全球銷售額就已經跌超過6%，李書福一啲都冇灰心，繼續以佢汽車狂人嘅風格火併。
Volvo最近已經掌握到新嘅技術，例如潔淨車內空氣嘅技術，空氣會比車外潔淨20至100倍！北京依家空氣污染咁嚴重，唔怪之得可以咁豪氣講：「打開車門係北京，閂埋車門就係北歐」﹗佢話保證日後大家坐喺Volvo車入面，會吸到接近北歐嘅空氣質量。
佢話內地Volvo新汽車廠，每年將會生產12萬部Volvo，並聘請2,500名員工，內地作為全球最大豪華房車市場，今年頭五個月其實已經帶挈Volvo汽車有27%嘅銷售增長，不過市場佔有率仍然排喺Audi同 BMW AG呢啲龍頭汽車之後，排名第五，唔知呢項空氣清潔技術可唔可以吸引到多啲人買呢？