內地人去外地旅遊時嘅豪氣，幾乎全世界都知，絲絲講個數字畀大家聽，等大家「感受」下。胡潤百富發表新一份《中國奢華旅遊白皮書》，平均每筆消費八百七十五歐元，一年升咗百分之八，比全球平均消費更加高逾七成！
舊年中國出境旅遊人數高達八千三百一十八萬人，超越旅遊大國德國同美國，成為全球最大出境旅遊嘅市場。高端消費者上年出國頻率減少，平均二點八次，比前年少零點四次，數字減少唔知同內地提倡「三公」有冇關係，呢啲高端消費者鍾意去歐洲國家，以法國為最受歡迎！
調查喺今年三月至四月進行，訪問咗近一百位坐擁千萬身家嘅內地高端消費者。原居地喺一線城市嘅超級富豪，最鍾意旅遊嘅國家頭三位分別係法國、美國同新加坡，其餘都係以歐洲國家為主。
雖然結果顯示佢哋出國次數減少，但係消費力就有增無減，再次蟬聯全球第一，平均每筆消費八百七十五歐元，同年上升百分之八，比全球平均消費更加高逾七成！有三分之一億萬富翁仲表示，準備喺未來三年買私人遊艇，比前一年升咗一倍咁多，仲有一成半人話會買私人飛機添，真係機票錢都慳番！
調查亦有問內地富豪，未來兩年如果想喺海外買豪宅會揀邊度？佢哋答首選美國西岸，次選係香港，絲絲真係開始擔心香港樓價會繼續高企！
余詩韻