內地人買貴晒啲樓，又有新「證據」喇！SOHO中國（00410）行政總裁張欣家族，一直傾緊要收購美國紐約通用汽車大廈（General Motors Building）四成股權，據聞已經搞掂晒，作價相當於通用汽車大廈市值升至約34億美元，成為美國最昂貴嘅商業大廈。
據《華爾街日報》講，張欣家族及Safra銀行家族旗下公司組成嘅財團，同意向一個中東主權財富基金支付逾7億美元（約54.6億港元）（不包括買家需承擔嘅債務），以購入通用汽車大廈四成股權，大廈其餘六成股權由波士頓地產公司（Boston Properties）持有。當地經紀話，呢單相信係中國單一投資者喺美國最大一宗不動產投資。
通用汽車大廈樓高50層，大樓面積約18.6萬平方米，鄰近中央公園，係紐約著名地標之一，租戶包括蘋果全球旗艦店、化妝品巨擘Estee Lauder及律師事務所Weil, Gotshal & Manges LLP，舊年年底出租率為95%，經紀笑言，今次作價反映嘅物業市值升幅，肯定跑贏租金升幅，同埋出租率升幅。
余詩韻