絲絲講場：電能低碳午餐好味又環保
潮流興低碳，最容易做嘅，就係三餐入面選擇多菜少肉。電能實業嚟緊有低碳午餐供應，董事總經理尹志田親身試過味，各位員工明日趁住「世界環境日」就可以享用喇。
衣食住行全面實踐
尹生話呢個低碳午餐會食到「舔舔脷」，主菜係車厘茄蝦意粉，配以手拍黃瓜，同埋甜品啤梨果凍。除咗多菜少肉之外，查實低碳包括好多嘢(口架)，例如透過選擇本地食材，減少運輸、儲存需要；避免猛火或長時間煮食，採用涼拌等烹調方法，可減少能源消耗同營養流失。
平時食一份包括芝士漢堡包、汽水及薯條嘅快餐，會產生3.9千克二氧化碳排放，相比之下，今次呢份低碳午餐產生嘅二氧化碳排放量只有不到1千克，而且熱量只有約410卡路里。
尹生話，公司仲鼓勵員工從「衣食住行」四個方面身體力行，實踐低碳生活。除咗低碳飲食，亦鼓勵員工回收舊衣及玻璃樽、以步行代乘車等等。
余詩韻