好多大學都會請名人喺大學畢業典禮講吓人生道理，等班畢業生好好思考自己究竟行緊條乜嘢路，好似喬布斯○五年喺史丹福大學嘅演講，絲絲重複聽咗好多次。美國聯儲局主席伯南克日前就喺普林斯頓大學，同一班畢業生唔講經濟，反而講咗十個人生、事業和愛情嘅忠告，咁貼身嘅題材，應該冇人瞌眼瞓。
呢十個忠告聽落好簡單，但要一班九十後做足，睇怕有難度。勇於接受挑戰、做個好人兼知足常樂、愈幸運者愈任重道遠、勤力專注，呢幾項比較大路啲；願意服務社會大眾、金錢非萬能、學好經濟學、不怕面對失敗，呢幾項都係絲絲都識得講嘅道理；跟住兩項就算係比較少名人會喺大學畢業禮講嘅內容。
伯南克叮囑各位，揀男、女朋友嘅時候唔好以貌取人，最緊要內涵，萬一結咗婚，成世人流流長，最緊要都係搵一個支持自己、了解自己嘅拍檔。
最後，佢仲叫班後生仔女，久不久就要打電話畀父母，唔好忘記係邊個供書教學，仲幫佢哋畀大學學費咁話！
伯老咁講係有原因(口架)，皆因佢為咗供阿仔讀醫科，都孭咗40萬美元學費債，呢個數唔係絲絲亂作，係佢自己喺聽證會爆(口架)。
余詩韻