期指觀瀾：跟勢追沽先機已失
在A股疲弱拖累下，二至四月港股一直跑輸歐美股市，估唔到人升佢唔升，華爾街退市憂慮升溫，跌就一齊跌，五窮之後仲要六絕，大市踏入六月第一個交易日，淡友便來個先聲奪人。
昨港股經歷低開、回穩反彈再低收，滙豐編製中國五月製造業PMI終值，修訂到低於50，去到49.2，成為少數能夠被淡友利用的利淡消息，恒指昨埋單跌109點報22,282點，連續四日的跌市，累跌642點。
昨日期指蠱惑之處，在跟上周五外圍弱勢開出21,989點後，九點半後已反彈到22,338點，以及重返21,423至23,512點的0.5回調支持樓上，到下午確認再失守重要支持，假如心存僥倖，抱住「睇多陣」的心態入市開倉，昨日已被早市的走勢陷阱吞噬。
昨日提過恒指唔確認重返50日線樓上，唔值得太心急試開好倉。睇番今浪中資股的調整壓力，比恒指過之而無不及，恒指尚未跌穿21,423至23,512點的0.618回吐支持約22,221點，國指上周五就率先失守0.618的10,638點支持，加埋近日日本股市急跌，氣氛多少對港股有所影響，筆者承認追沽港股有先機已失的情況，但博反彈，在大環境未見配合下，也是不能急於一時。
John Mullen