Market Insight：淡友搶攻 沽空為主

港股要沉淪到幾時？真係要問阿爺。昨日滙豐中國公布五月製造業PMI終值，向下修訂到49.2，離50盛衰線又遠一步。家陣港股中資企業比例愈來愈高下，中央維持疲弱的經濟「自由發展」，港股氣氛要全面改善並唔容易。

上周五，美國道指大冧檔跌超過兩百點，包括古勝在內，以為周一復市港股注定凶多吉少，殊不知全日走勢相當陰濕，低開倒升之後，下午先跟住日股同埋歐股急轉直下。睇番主板成交得592億元，比上周五MSCI進行換股當日的796億元少四分之一，反觀期指成交比上周多12%去到7.24萬張，大孖沙趁現貨成交唔旺，壓住現貨同時響期指搵食的技巧，漸趨化境。

古勝冇點你

萬里長空

銀基盈警走勢惡劣

昨日淡友相當積極，沽空佔成交比率連續四日企穩雙位數字，沽空額60.9億元，比率10.3%，升跌股份比例68對32，是七個交易日最差。上周五收市後，劉央愛股銀基集團（00886）發盈警，預告全年業績見紅，上周五銀基離奇抽升，昨日已經跌凸，隊低9.5%收報1.71元。

上半年蝕掉1.77億元人民幣，全年見紅是預期之內，銀基的問題係中央政府反貪引發，禁絕公費豪飲，去年茅台酒價格跌近三分之一，近期仲未止瀉，五糧液價錢亦大同小異。

三月中銀基高管增持，睇嚟對恢復市場信心作用唔大，去年九月底止中期報告，最得人驚係21.1億元人民幣存貨及應收帳，足足係資產淨值17.95億元的1.17倍，以半年營業額2.35億元人民幣，擔心全年業績一旦有存貨減值或者應收帳撥備，損失唔係1.77億元乘二咁簡單。

中煉化業務太成熟

真係市有市跌，股有股炒，三月至今上市新股，居然得朗廷（01270）及中煉化工程（02386）兩隻潛緊水。老友問起對中煉化睇法，會唔會係中石化冠德（00934）子憑母貴翻版？由炒作角度，單睇保薦行「牌頭」，高盛、摩通、瑞銀加埋中信証券掛帥，中煉化確係有啲睇頭，但如果睇基本因素，真係自問睇佢唔透。中煉化同冠德的透過注資逐步湊大佢的玩法唔同，本身煉油、化工及煤化工程項目的設計同工程生意已經十分成熟，內地生意基本上完全來自內地石油石化產業三大巨頭（佔生意額八成以上），單係阿媽中石化集團已經佔佢收入過半數，去年達50.2%。

內地煉油建設工程唔係隨便邊個都可以做，意味着無比較下，中煉化項目毛利率無乜討價還價條件，尤其上市後中石化仲揸住67%，賺多賺少出於主理人想將經濟成果，放在上層公司抑或下層子公司浮現出來，相比之下，揸中石化至少大概知道每年採油及煉油賺、蝕幾多，在下才疏學淺，中煉化自認係唔識睇。

中信泰富便宜莫貪

所謂「屋漏偏逢連夜雨」，近期鐵礦石價及澳元齊齊插水，股價一路向下的中信泰富（00267），消息話旗下中澳鐵礦項目第一條生產線技術上遇到問題，又要停產兩個月進行修檢，股價昨跌4.4%排在藍籌包尾，收報8.78元，睇怕去年九月的四年低位8.64元，今浪未必頂得住。

自從炒燶外匯之後，中信泰富真係無好過，鐵礦石項目遲遲未見回報，今時今日內地製造業對鐵礦石需求已大不如前，令前景轉眼間一片迷濛。昨日兩份大行報告，都用資產折讓夠大為理由，認為中信泰富股價跌得八八九九。

近半年仲留低港股搵食資金相當揀擇，夠平但無復甦故事配合都無人吼，過去兩年半中信泰富市帳率由1.5倍碌落嚟，依家得番0.4倍，古勝認為，客觀睇已經係好平，但如果見唔到鐵礦石價格因中國經濟轉強出現報復式反彈，港股內千幾隻股票又點解要揀佢？

古勝