Market Insight：外圍震盪沉着應戰

滙豐中國五月製造業PMI跌穿50，去到49.6的七個月低位，但估唔到，周六公布的五月份中國官方PMI，卻意外地回升，由50.6升至50.8，主要是生產指數由52.6回升至53.3所帶動。

兩個數據呈現官升民跌的結果，或多或少反映大型國企的景氣展望，的確遠勝民企，但相信不足以影響近期陸續下調中國全年經濟增長預測的分析師睇法。反而今次數據之後，中央短期推出新的刺激經濟措施甚至減息的機會細咗，數據對股市影響屬中性。

古勝冇點你 03/06/201３

萬里長空

房託基金現洗倉潮

聯儲局主席伯南克上個月二十二日出席美國國會答問時，提及未來幾次聯儲局會議有機會研究減少買債規模後，債券牛市是否因此被判死刑？市場睇法暫時都幾一面倒，先係holding cost貴到死的黃金大插插，升息預期連高息的房託基金也開始出現洗倉潮，如領匯（00823）、冠君（02778）、陽光房產（00435）及置富產業（00778），上周累積跌幅介乎7.5至10.1%，高位先追，隨時息不抵價，但暫時仲有新債王岡拉克（Jeffrey Gundlach）企硬，話十年美債息重上2厘樓上，會重新入市大手掃貨。

其實債市大冧檔，債息短短四星期由1.6厘抽升至2.2厘，主要建基於投資者對美國經濟復甦，尤其樓價反彈的預期升溫，但債息同美國按揭息率「息息相關」，美國按息受債息急升影響，上星期重返4厘樓上，加埋美國政府開始削減開支，樓市下半年升勢料會放緩，到底美債息會唔會畀新債王睇死，升唔穿2.4厘？睇相佬呃你十年八年，上星期債息同債王預期高位只差0.2厘，唔使幾耐應該有答案。

聯想可作兩手準備

個市唔掂，但無阻細價股尋寶熱，上星期五恒指及國指成分股，高或低過50日線比例，分別係17對33同13對27，簡單啲講係三隻成分股之中，兩隻已低於50日線下，正處弱勢，反而市值50億及10億元以下中小型股份，高或低於50日線比例分別係644對534同385對347，強勢股仲係比弱勢股多。上月科網股表現優於大市，圍繞互聯網、手機製造、流動通訊增值服務、以至電子、軟件、網遊等股份百花齊放，確實係近年鮮見嘅現象。正積極拓展手機及平板電腦業務嘅聯想集團（00992），近周股價表現比想像中理想，10日線已抽穿50日線，上周五股價一度高見8.02元，最後收報7.99元。

兩手準備，短線若能以大成交突破三月下旬高位8.29元，可反覆向上試8.8至9元阻力區；若未能突破，則可待回試7.6至7.7元水平支持再作考慮。

大股東及私募基金出怪招低位增持的李寧（02331），果然有後着，股東大會後管理層透露，去庫存工作於下半年可達標，但講啲唔講啲，無提最近同店銷售情況，但營運見底預期，就足夠令上周五股價急升15.7%，見5.29元。

李寧難玩在於大股東動向難測，大行估今年要蝕3.5億元人仔，明年止血，賺1,500至2,000萬元人仔，一五年有2.58億元人仔利潤，但都講緊21倍市盈率。早輪古勝話4元博得過，一來兩大主要股東都傾向3.5元加注，以一成多損失死唔到人，其次四、五月期間，股價在4元水平上下，累積唔少沽空，今次一夾，話唔埋可以順勢補番一月5.9至6.15元留低的下跌裂口。

國美尋底完成值博

至於另一鳳凰股，國美（00493）首季季績由蝕轉賺7,600萬人仔，上周五股價見0.83元高位，可惜捱唔到尾，升幅收窄到得兩格，收0.8元。

講到底，首季同店銷售反彈17.6%的確唔錯，可惜虛擬網店未止血，首季蝕成1.2億人仔，可見網上同傳統店唔同，IT員工薪酬高於傳統銷售員，價格透明度高毛利率低，要靠量取勝，初起步相當輸蝕，不過近排股價在0.75與0.8元之間橫行，看來已見經完成尋底，趁個市仲響業績紅轉黑的鳳凰股中尋寶，應該仲可以一博。

古勝