美國《福布斯》雜誌又公布新一年台灣嘅富豪榜喇，旺旺集團主席蔡衍明以106億美元（約826.8億港元）蟬聯台灣首富之位！根據《福布斯》嘅統計，蔡衍明過去一年身家增加咗26億美元，皆因舊年中國旺旺（00151）嘅股價就升咗兩成幾！
56歲嘅蔡衍明現時除咗專注旺旺食品同飲料之外，仲涉足金融、媒體同酒店業務，百足咁多爪，實行分散投資努力搵銀！有指旺旺主要受惠於內地銷售市場，但食到內地食品呢條水嘅又點只旺旺，內地最大茶飲料供應商康師傅控股（00322）嘅魏氏兄弟，同樣賺個盆滿缽滿。康師傅係百事集團（Pepsi）喺內地嘅合作夥伴，家族財富有67億美元，名列台灣第三富豪。至於富邦金控董事長蔡萬才就以81億美元屈居第二位，而香港人熟悉嘅鴻海董事長郭台銘則以48億美元排第四。
另一邊廂，曾經喺前年以88億美元登上台灣首富嘅宏達（HTC）創辦人兼董事長王雪紅同丈夫陳文琦，今年則係連續第二年排名下跌。絲絲聽聞HTC面對蘋果公司同三星兩面夾擊，全球競爭力大減，銷售額走下坡，令佢哋身家大縮水，今年僅以25億美元排在台灣富豪榜第13位，睇嚟HTC真係要諗諗計，突圍而出挽救公司業績喇！