上市公司開股東大會要出動胡椒噴霧？唔好以為絲絲講笑，內地首開「B轉A股」先河嘅滬市上市公司東電，尋日喺杭州開股東大會審議大股東浙能電力換股合併東電B嘅方案，因為知道好多小股東對個方案不滿，上市公司事前已經做足準備，唔單止保安人數眾多，仲請定警車同救護車到現場坐鎮，而事實證明，班管理層絕對冇低估到小股東嘅怒火。
班小股東點解咁群情洶湧？事緣今次東電嘅B轉A方案，重點係由大股東浙能電力向全體股東發行A股股票，跟住通過用換股方式吸收合併東電B嘅方式變相整體上市，而中小股東最不滿嘅係換股嘅時候用淨資產折價，上市時就按市盈率計價，擺到明搵B股小投資者着數。
尋日朝早，班小股東先帶埋「裝聾作啞，畏懼權貴」錦旗去浙江省證監局門口抗議，晏晝行動進一步升級，先喺股東大會上趕咗東電B財務顧問中金公司嘅代表落台，到咗投票時更加質疑投票過程存在舞弊，群起同工作人員搶票箱，搞到最後要出動公安入場維持秩序，用胡椒噴霧清場，場面十分之混亂。股東大會被迫暫停，方案夠唔夠票通過暫時未有人知，不過，呢單首開先河嘅「B轉A」案例爭議不斷，相信中證監官員都難免頭痛。