中銀香港（02388）尋日舉行周年股東會，絲絲收睇視像轉播，發現小股東個個有備而來，問題相當有水準，直情做埋記者嗰份！
例如有位姓麥嘅小股東，一口氣問咗四、五條問題，範圍包括公司業績、按揭業務、派息政策，同埋新加坡、台灣開展人民幣業務對公司嘅影響；其他小股東接力，問埋董事長繼任人選、未來分行網絡部署等，問題針針到肉。
另一個反映小股東厲害嘅例子，係佢哋好留意董事嘅參與程度，有小股東批評獨立非執董寧高寧出席率偏低，絲絲睇番年報，寧高寧嘅董事會會議出席率係「零」，唔怪之得佢重選董事「獲得」10.69%反對票啦。
面對小股東咁牙尖嘴利，中銀總裁和廣北好有耐性咁逐一回答，講到人民幣業務發展策略時，佢除咗重申中銀嘅競爭優勢之外，仲不忘「硬銷」公司產品，話人民幣基金投資產品好受歡迎，而公司之前推出嘅一款人民幣高息債券基金仍然接受認購，仲提醒有興趣嘅小股東向分行查詢添。
余詩韻