Market Insight：前海概念錢途無限

昨日話基金炒無可炒，純因落後，早輪換貨捧航運、工業及煤炭等中短期業績無景的股份，同時沽電力、燃氣及家電等經濟低迷中仍保增長的防守股有啲過分，話口未完即見反彈，出盈喜的中國燃氣（00384）昨勁升6.1%、華潤燃氣（01193）升4.7%、華潤電力（00836）升3.7%、華能（00902）則升2.8%，新奧能源（02688）亦有2.1%進帳。

家電股更有消息配合，創維數碼（00751）升7.5%、TCL多媒體（01070）升6.5%、海爾電器（01169）則升4.8%。事緣早排內地樂視網大鑼大鼓話搵日本SHARP合作供應面板，生產60吋全高清超級網絡電視「樂視TV」，只賣6,999人仔。

古勝冇點你 29/05/2013

萬里長空

iBond買少少無妨

堅的話，真係隨時飲埋傳聞明年先推網絡電視iTV的蘋果公司頭啖湯。芬佬見到咁抵食挾大件，怕傳統電視唔係佢手腳，先隊到創維同TCL多媒體連阿媽都唔認得。昨日SHARP否認，樂視網A股亦都拉埋閘，兩隻內地電視股即刻呈報復式反彈，看來世界上確係無咁大隻蛤乸隨街跳。

政府第三批iBond出籠，規模同早兩次一樣，唔多過100億元，入場費每手1萬元。今次唔少銀行及證券行推出一大推優惠，零息、零佣金及保證回購價，總之五花八門，就係怕做唔到生意仔。首兩次iBond超額倍數分別係0.32倍及4倍，今次催谷下，再破紀錄應是預期之內，抽嚟搵餐茶錢無妨，但真係唔好預分得多，尤其依家個市開始旺番，近排資金明顯由商品及高息股中減磅，揸住隻iBond等收息，機會成本好貴。

深國爆炸力較強

二月開始，人民幣幾乎日日新高，昨日見6.1203，過去兩個月升值超過2%。傳統上，人仔強對航空股有利，不過今年有H7N9，加埋中央反貪令旅客及商務外遊減少，票價下跌，東航（00670）首季業績見紅，今年股價跌8.4%乃三隻航空股之中最弱，計落佢536億人民幣負債中，有九成三係美元債務，人仔轉強意味債務變相貶值，短期會成為死貓彈藉口，穿一穿2.8元之後即見反彈，或者短期有機會睇番3至3.1元之間。

靜咗成個月，前海概念又蠢蠢欲動，中集集團（02039）及深圳國際（00152）分別升1.4%及3.8%，主要係市場預期，下個月中央對前海企業稅務優惠政策出台，預先炒定這批有「國策」支持的變種地產商。深國在前海擁有38萬平方米前海地段工業地皮，計劃中會興建展銷中心、酒店及高檔公寓。

分析員計過改土地用途及地積比後，以3萬呎計價值大約240億元，連埋其他資產，好似南玻、深航、深高速（00548）及其他公路及扣除負債後大約100億，市值176億仲有四成九折讓，稍高於內房股平均折讓三成，有水位可炒。最近先由中遠太平洋（01199）賣番畀阿媽的中集，在前海擁有52.42萬方米地皮，如果要二選中，比較前海資產以外生意，深國較為標青，相信短期爆炸力會稍勝中集。

醫藥股氣氛改善

昨日科網股同手機股回軟，炒家發掘新對象，醫藥股普遍做好，國藥控股（01099）及上海醫藥（02607）分別升3.3%及1.6%，石藥集團（01093）亦一度重上4元樓上，高位見4.04元，收報3.98元，升3.1%，成交2,309萬元。

上月下旬，石藥遭股東配售3.3億股股份，配股價3.6元，相信接貨的屬機構投資者居多，應有助增加股份流通量，而過去一個月，其股價一直穩守在配股價之上，昨日股價重上10日線，似係完成整固，若板塊氣氛轉熱，有機會再試52周高位4.42元。

古勝