「芭莎之夜」夠墟冚
絲絲聽講民行香港啱啱上個禮拜，同英國皇家藝術學院美術館等，一齊搞咗個「芭莎藝術之夜」，仲頒咗年度藝術家、藝術社會推動獎同當代藝術貢獻獎等，畀啲藝術攝影家以及評論家等唔同嘅藝術界人士。
雖然民行香港只係喺度開業一年幾，但原來已經第二次搞呢個活動，聽聞唔少藝術收藏家同機構代表等200幾人出席，都算係一個好墟冚嘅藝術活動。
其實銀行做公益同社會責任，往往都好有主題，聞說民行喺內地，都係比較多做藝術方面嘅公益工作，甚至有人稱佢做「藝術銀行」，今年三月民行香港一周年都唔執輸，跟住總行個方向，借勢搞咗場音樂會，冠名香港小交響樂團演奏貝多芬第五交響曲《命運》等。