電動車未成氣候又有新例證，以色列電動車廠Better Place日前申請破產，主要原因是銷情欠佳，佢嘅債主之一，就係滙控（00005）。
破產嘅電動車生產商又點只Better Place，早前傳李澤楷有意收購嘅美國車廠Fisker，就係因為資金不足而要停工，公司欠美國政府嘅債務更加高達1.71億元（美元‧下同），惟有聘請破產顧問，幫手搵頭好人家。
Better Place由以色列商人Shai Agassi喺○七年創立，當時吸引到唔少著名投資者入股，包括滙控、通用電氣、摩根士丹利，及以色列綜合企業Isarel Corp等，籌得8.5億元。Shai Agassi更成為《時代雜誌》○九年十大風雲人物之一。
Better Place提出「Quick Drop」換電站計劃，令電動車主喺電池耗盡時，只需到換電站換電，省回充電時間，但由於換電站過少，加上其拍檔法國車廠雷諾嘅電動車體積過大，令其向雷諾預訂嘅10萬輛電動車僅售出2,500輛，咁嘅情景，舊年公司錄得高達5.61億元虧損。