自從今年三月樓繼偉升呢做咗財政部部長後，作為正部級嘅中投董事長個位就真空咗咁耐，江湖傳聞話，上海市常務副市長屠光紹、人行副行長易綱、前中證監主席郭樹清死都唔肯接手，中投董事長一職慘變「燙手山芋」，搞到「符合條件嘅不想接手，想接手嘅不符合條件」。
絲絲聽聞，候選人原來擔心中投嘅投資埋藏地雷，甚至黑洞，好似中投喺金融海嘯時期入股摩根士丹利同黑石就搞到巨虧，比較低調嘅房地產同私人股本投資聽講業績都係麻麻哋，佢哋驚死中伏要孭鑊，唔好以為側側膊咪可以將啲黑鑊卸番畀上一手，之不過，樓繼偉升咗做財政部部長喎，有邊個夠膽咁做呢？
唔好以為唔想接呢個job，咪推咗佢囉，邊有咁易吖，呢啲咁高層次嘅職位，被欽點後，呢位候選人要提出強有力嘅理由先可以成功說不，聽講屠光紹就話自己未完成將上海建成國際金融中心嘅重要任務，情願留喺上海繼續努力喎。至於易綱及郭樹清，用乜嘢理由推卻，絲絲就不得而知。
雖然中投董事長未搵啱人選，但原本由金立群擔任嘅中投監事長職務，尋日剛好搵到接班人，佢就係工行副行長李曉鵬。
余詩韻