內地有錢人鍾意移民，但外界成日批評移民潮會加劇資金外流同埋方便啲貪官捲款出逃。不過，曾經做過人行貨幣政策委員會委員嘅樊綱就有唔同睇法，佢早兩日接受內地媒體訪問嗰時好坦白咁講，人有錢之後想過好啲嘅生活係好自然嘅事。好似優質嘅兒童教育、好啲空氣環境、空曠同舒適嘅住所，呢啲嘢中國現時真係提供唔到，如果買一個外國身份就買到，其實都係一件好事，最重要係呢班有錢人英文未必個個都好，佢啲錢大部分仲係會留喺內地，就業同投資都留喺度，就唔會掏空中國嘅實體經濟。
雖然對內地空氣同居住環境唔係太滿意，但係講到經濟發展，樊綱絕對持樂觀態度。佢話中國除咗部分污染行業唔受歡迎之外，可以話係唔存在夕陽行業，因為中國嘅消費市場啱啱起步，無論係勞工密集型嘅皮鞋生產，定係服務性行業嘅火鍋店，只要專注、專業咁去發展，就可以盈利，甚至連專做洗腳（即係足浴），都有機會可以上市。
余詩韻