歷史洪流有時真係不可阻擋，植根英國140年嘅老牌電訊公司英國大東電報局（Cable & Wireless），宣布將總部撤出倫敦，搬到美國佛羅里達州南部，咁咪即係暗示英國大東棄守英國市場，轉戰到美國市場？
可以稱得上係英國嫡系電訊商英國大東喺一八六○年代成立，前英國首相戴卓爾夫人執政期間，成為首批被私有化嘅公司，業務仲遍布歐洲、亞洲多個地方，包括持有過電訊盈科（00008）前身香港電訊。
不過隨住九十年代，電訊市場開放，英國大東嘅美國長途電話業務大受打擊，公司開始走下坡，去年收入下跌4%至19億美元。而英國大東自二○○○年將香港電訊股權出售，一二年又被Vodafone收購歐洲業務，如果遲啲落實埋出售澳門電訊嘅交易，其他地區業務都所餘無幾喇。
所以今次搬總部嘅決定，再加上計劃兩年內削減成本一億美元，睇得出英國大東已經疊埋心水將公司版圖縮細，集中發展南美等市場。外人睇落梗係覺得英國大東風光不再，但英國大東就解釋話既然專注做南美市場，倒不如將總部都搬近啲，佢哋都好想公司有個大改變。
余詩韻