去銀行拎錢頂多幾萬元，但如果錢多到要用裝甲車送去你屋企就真係好有霸氣！話說前美國運通銀行亞洲區主管、現任JK Capital Management主席桂徵麒（Randy）近排出咗本新書，入面講到佢喺金融界打滾四十年經歷嘅風風雨雨，其中一段就講佢喺杜拜出任花旗銀行分行經理時嘅事迹。
當年銀行最大嘅客戶就梗係領導人拉席德（Sheik Rashid）喇。原來佢喺銀行開咗好幾個戶口，存入大量美金兼且唔收息，不過就有個特別要求，就係佢每年都會去巴基斯坦狩獵兩次，需要大量現金同旅遊支票，每次花旗都要動用成個現金部門先可以喺半日之內數夠錢送入王宮。嘩，絲絲想像到一車車現金咁送入王宮個場面，一定好墟冚！
77歲嘅Randy多年前以華人身份做到花旗銀行分行經理當然唔嘢少。原來佢爸爸桂中樞係上海著名評論員兼律師，二十年代已經加入《紐約時報》做記者，果然虎父無犬子！
余詩韻