國際金融大鱷索羅斯話就話退休，但係呢位八十二歲嘅老人家，其實不單止無停過，反而狙擊獵物仲比以前頻密咗。絲絲同佢計計數，包括二月嗰陣沽冧YEN賺咗10億美元後，再趁住英國畀穆迪搣咗3條A評級之後，三月連隨再直隊英鎊，搞到鎊紙跌咗近一成，之後咪到四月轉炒金價大跌，果然插到1,350幾美元然之後又喺金價反彈時走人，跟手又短炒一周，沽澳元賺咗4,000萬鎊，再一個屈尾十嚟玩番轉金礦股，賺到盆滿缽滿。等你哋唔讚佢老而彌堅都唔得！
睇嚟呢位老人家似乎冇諗住抖吓嘅意思，啱啱又據聞佢吼中咗一間科技公司，聽講早前已傳過佢有意買入巴西同緬甸嘅手機牌照，呢幾日則被發現，原來已透過旗下基金公司注資5,000萬英鎊落英國一間小型寬頻供應商，協助公司開拓英國業務。
呢間被索羅斯點石成金嘅電訊公司叫做Hyperoptic，只有兩、三年歷史，成間公司得嗰49名員工，寬頻網絡覆蓋僅僅超過二萬個家庭。公司當然like爆啦，有咗索羅斯呢條大水喉，今年有意將業務拓展去多10個英國城市，增加網絡覆蓋至五十萬戶，並且提供網上電視服務，實行互聯網、手機、電視三管齊下！
絲絲原本覺得呢間電訊公司真係細咗啲，無咩競爭力喎，但原來索羅斯睇中佢背後嘅光纖通訊（Fiber-optic）技術，可以提供每秒1GB嘅網速，係當地電訊公司平均網速嘅83倍！咁有內在發展潛力，唔怪之得索羅斯會睇中佢啦！
余詩韻