Market Insight：震盪難免 保留實力

隔晚伯南克在國會發表講話，在買債話題上唔退又退，一時話唔會過早減少買債，被共和黨議員質多幾質，又話未來幾次開會可能開始討論。結果畀幾句說話，道指高位狂掟兩舊，也令華爾街三大指數的歷史走勢圖上，畫咗穿頭破腳，惡劣到極的轉勢訊號。如果你係技術走勢信徒，真係要即刻清倉離場。

古勝認識的芬佬中，睇市出色的甚少純以技術走勢操作，必定係精於走勢，揣摩市場氣氛及基本分析三個範疇，缺一不可，否則，如果見到美股、美債、日股及外匯全部唔係穿頭破腳，就穿腳破頭，莫非真係統統要掉轉邊做？

古勝冇點你 24/05/2013

萬里長空

資金氾濫投機過度

日股昨創自兩年前「三一一」地震後的最大跌幅，加上滙豐中國編制的五月製造業PMI初值跌穿50盛衰線，引發恒指大跌591點收報22,669點，如果把夜期隊到落兩萬二邊的「傻盤」計埋數，昨日低位比周二期指收市跌超過千一點，誇張到暈。唔少金融界名人認為全球央行爭相量寬，資金氾濫造成過分投機，金融市場暴升暴跌日子會出現得比以往頻繁，震盪難免。不過，本港投資者一向見慣風浪，實在毋須太過驚慌，現階段宜保留實力。

日股在無特別利淡消息下急瀉7%，講到底係去年十一月至今，狂升81%升過龍的後遺症，低位入市的投資者找藉口來鎖定既得利潤。事實上，美國失業率即使回落至6.5%退市觸發點，在目前全球產能過剩問題持續惡化，外判成本依然低迷，失業率要返回○七年海嘯前的4.5%樓下，難度相當大，就算聯儲局減少買債規模（近月聯儲局查實用唔盡850億美元買債上限，只是甚少人提到），也不代表有加息的條件。

特步再跌水位唔多

睇番聯邦基金利率期貨，一年半後，即一四年十月底一次議息，債商估美息脫離0至0.25厘超低息機會率，僅21.9%，當中0.5厘及0.75厘的機會率各自是18.2%及3.7%，即係加一個quater嘅機會連五分一都唔到，央行及債商顯然擔心通縮多於對通脹復燃。昨日歐元區公布的五月各項PMI初值都低於50盛衰分界線，滙豐中國五月製造業PMI初值49.6也創七個月新低，人行下半年回到寬鬆貨幣政策甚至減息可能性增加，大落後的A股不排除有翻身的一日。

全世界搵藉口狂掟out performer，又係時候睇番啲唔多郁的入定股。特步國際（01368）出營運數據，指實施多項嚴謹措施針對存貨過剩問題，加上新產品推出，今年首季同店銷售與去年持平，另外，在截至四月底止的第四季度，訂貨會訂單金額按年跌15至17%，跌幅比第三季20%稍有改善。

四月開始，股市升浪中體育用品板塊完全得個睇字，算係大落後板塊，特步股價由四月底至今，升得3%，大行估緊公司銷售額及盈利要跌18.2%及22%，下半年至明年初業績企穩，9倍市盈率話平唔平，但預期息率有6.4厘，股價應該再跌水位唔多，唔怕守株待兔，現價買些少等復甦都唔錯。

近年中港兩地都面對人口老化的問題，美銀美林最近發表的研究報告預計，未來一年內地頗大機會放寬一孩政策，即容許每個家庭生育兩個細路。若然呢個預測成真，該行預計未來五年內地將新增1,700萬至2,000萬個嬰孩，到一八年，零至四歲的人口將達到一億人，屆時內地的嬰兒產品市場將即時受惠。

發掘人口政策商機

由於農村已某程度放寬了生育限制，故預測一孩政策的放寬對城市的影響更大，畢竟城市人口的消費能力亦較農村為高。要發掘受惠股份，美銀美林還提供了四大選股條件，分別是市佔率正在上升、在內地城市覆蓋率高、擁有強勁的品牌資產。雖然本土企業一般在農村的覆蓋強於城市，但就認為合生元（01112）及青蛙王子（01259）較例外，事關兩者憑着產品質素同分銷網絡的優勢，成功搶佔市場份額。想押注一孩政策改變的話，不妨留意吓呢兩隻股份。

古勝