絲絲講場：Tumblr卡普勸人唔好輟學
雅虎以11億美元嘅高價收購微博網站Tumblr，年僅26歲嘅創辦人兼行政總裁卡普（David Karp）一鳴驚人，個個都羨慕佢15歲輟學都咁好成績，查實佢都有啲後悔唔讀到畢業。
佢依家身家超過2億美元，傳媒爭住訪問佢，佢好唏噓咁話自己當年咁早退學，錯過晒青葱歲月，佢仲以過來人身份，勸各位學生哥唔好有樣學樣，跟佢一樣咁早就離開校園生活。
富豪多唔志在「沙紙」
除咗卡普，微軟始創人蓋茨哈佛未畢業就去創業，一樣做到全球首富；扮空姐扮得「維妙維肖」嘅維珍航空老闆布蘭森16歲輟學；法國PPR集團主席皮諾（Francois Pinault）當年因為同學仔笑佢窮，決定停學去爸爸嘅木材廠打工，依家已經係法國第三大富豪，睇嚟唔志在張畢業證書嘅成功人士大有人在。
所以，學歷愈高，唔代表賺錢能力就愈高。發咗達嘅卡普，依家叫人唔好學佢，唔知有冇人聽呢？