絲絲講場：Apple品牌值萬四億貴絕
「BrandZ全球最具價值品牌」啱啱公布咗，今年頭三位都係科技相關嘅品牌，所以認真唔可以睇小科技對我哋生活嘅影響！
今年最值錢嘅品牌仍然由蘋果公司以1,850億美元（約14,430億港元）蟬聯，比舊年微升1%。雖然舊年佢嘅股價表現真係麻麻，競爭對手追得好貼，不過咁都無損佢喺一眾消費者心目中嘅魅力，繼續穩坐品牌界嘅一哥地位！
排第二嘅就係Google，舊年佢嘅股價走勢啱啱同Apple相反；加上新產品Google Glass成功吸引各界眼球，令到Google嘅品牌價值升咗5%到1,140億美元，取代埋IBM成為第二位。排第三就係比舊年下滑一名嘅IBM，今年佢嘅品牌價值就跌咗3%，得番1,130億美元。
LV蟬聯精品之冠
絲絲同一班姊妹更加關心精品品牌呢個排名，喺絲絲心目中，呢個係「品牌中嘅品牌」，今年最具價值嘅係LV，雖然佢嘅品牌價值比舊年跌咗12%，不過依然以227億美元蟬聯榜首。排第二至四位嘅品牌分別係Hermès、Gucci同埋Prada；其中Gucci同Prada嘅品牌價值更加比舊年分別大幅上升48%同63%。呢啲名牌升值咁多，各位姊妹以後又多個藉口買多幾個手袋喇！